މައިކަޕް: ބޮޑުތިލަދުންމަތީގައި ބާއްވާ އެންމެ އަގުބޮޑު މުބާރާތް އަންނަ މަހު 18 ގައި ފަށަނީ

އިހަވަންދޫ ދާއިރާގެ ކުރީގެ މެމްބަރު މުހައްމަދު އަބުދުﷲ (މުހައްމާ)ގެ އިސްނެގުމާއެކު ބާއްވަމުން އަންނަ މައިކަޕް ފުޓުބޯޅަ މުބާރާތް ޑިސެމްބަރ 18 ގައި ފެށުމަށް ތައްޔާރުވެއްޖެއެވެ.

މިއީ މި މުބާރާތް ބާއްވާ 14 ވަނަ އަހަރެވެ. ބޮޑު ތިލަދުންމަތީގައި ބާއްވާ އެންމެ އަގުބޮޑު މުބާރާތުގެ ޝަރަފާއެކު މި އަހަރު މި ބާއްވާ މުބާރާތުގެ ޓައިޓަލް ސްޕޮންސަރަކީ އިހަވަންދޫގައި ކުރިއަރަމުން އަންނަ ވިޔަފާރިއެއް ކަމަށްވާ ބިއުޓިފުލް ބުލޫއެވެ.

ރާއްޖޭގެ އުތުރުގެ 7 އަތޮޅަށް މި މުބާރާތް ހުޅުވާލާފައިވާއިރު، މުބާރާތުގައި ބައިވެރިވުމުގެ ފުރުޞަތު އަންނަ މަހުގެ 1 ވަނަ ދުވަހަށް ހަމަވާނެއެވެ.

މިއަހަރުގެ މުބާރާތުގެ ޗެމްޕިއަން ޓީމަށް 100،000 ރުފިޔާ ހުށަހަޅާފައިވާއިރު، ރަނަރަޕް ޓީމަށް، 35،000 ރުފިޔާގެ ފައިސާގެ އިނާމެއް ވަނީ ހުށަހަޅާފައެެވެ.

މި ބޮޑު މުބާރާތް އިންތިޒާމު ކުރާ އިހަވަންދޫ ޕޯލްސްޓަރގެ ރައީސް މުޙައްމަދު ޝުޖާއު ދެލިއޮންލައިނަށް ވިދާޅުވީ އެހެން އަހަރުތަކާ ޚިލާފަށް މިއަހަރުގެ މުބާރާތުގެ އިންތިޒާމުތައް ބޮޑުތަނުން ރަނގަޅުވާނެ ކަމަށާއި، ޓީމުތަކަށް ސަޕޯޓުކުރުމަށް ރަށުން ބޭރުން އަންނަ ފަރާތްތަކަށްވެސް ރަނގަޅު އިންތިޒާމުތަކެއް ހަމަޖެހިގެންދާނެ ކަމަށެވެ.

މުބާރާތުގައި ބައިވެރިވުމުގެ ޝައުޤުވެރިކަން ވަރަށް ގިނަ ޓީމުތަކަކުން މިހާރުވެސް ފާޅުކޮށްފައިވާކަން ފާހަގަ ކުރައްވާ ޝުޖާޢު ވިދާޅުވީ މުބާރާތަށް އިހަވަންދޫ ވަރަށް ބޮޑަށް ތައްޔާރުވެފައިވާ ކަމަށާއި، މީގެ ކުރިންވެސް ޕޯލްސްޓަރ އިން އިންތިޒާމު ކޮށްފައިވާ މުބާރާތްތަކުން ފެނިގެންގޮސްފައިވާ ތަފާތު މި މުބާރާތުންވެސް ފެނިގެންދާނެ ކަމަށެވެ.

މި މުބާރާތުގެ ޓައިޓަލް ސްޕޮންސަރކޮށްދެއްވާފައިވާތީ ޝުޖާޢު ވަނީ އިހަވަންދޫ ޒުވާން ވިޔަފާރިވެރިޔާ މުޙައްމަދު ޔާމީނަށް ވަރަށް ބޮޑަށް ޝުކުރު ދަންނަވާފައެވެ. ބިއުޓިފުލް ބްލޫއިން މުބާރާތުގެ ފޯރި ގަދަކުރުމަށް ތަފާތު ހަރަކާތްތަކެއް ކުރިއަށް ގެންދާނެކަން އިޢުލާންކޮށްފައިވާއިރު، މިމުބާރާތުގައި ބައިވެރިވާ އިހަވަންދޫގެ ކޮންމެ ޓީމަކަށް އެހީތެރިވުމުގެ ގޮތުން 2000 ރުފިޔާގެ ގެ ސްޕޮންސަރ އެއް ދިނުމާއި، މުބާރާތް ފެށުމުގެ ކުރިން މައިކަޕްގެ 200 ޖާޒީ ހިލޭ ސަޕޯޓަރުންނަށް ހިލޭ ދޫކުރާނެ ކަމަށްވެސް ވަނީ އިޢުލާންކޮށްފައެވެ.