މެސީ އާއި ރޮޑްރީ ހިމެނޭ ފީފާ ބެސްޓް އެވޯޑްސްގެ ނޮމިނީސް އިޢުލާނުކޮށްފި

މެސީ އަދި ރޮޑްރީ ހިމަނައި، ދުނިޔޭގެ ފުޓްބޯޅައިގެ މައި އިދާރާ ފީފާއިން ދޭ ބެސްޓް އެވޯޑްސްގެ އެންމެ މޮޅު ފުޓްބޯޅަ ކުޅުންތެރިޔާގެ މަޤާމަށް ވާދަކުރާ ނޮމިނީސް އިޢުލާނުކޮށްފިއެވެ.

މެސީ ވަނީ 2019، 2022 އަދި 2023 ވަނަ އަހަރު ފީފާގެ ބެސްޓް އެވޯޑްސް ހާސިލްކޮށްފައެވެ. އަދި މެންޗެސްޓާ ސިޓީގެ ރޮޑްރީ އަކީ ދާދި ފަހުން ބެލޮންޑިއޯ އެވޯޑް ހާސިލްކުރި ކުޅުންތެރިޔާއެވެ.

ނޮމިނީސްގެ ތެރޭގައި ރެއާލް މެޑްރިޑްގެ ހަ ކުޅުންތެރިން ކަމަށްވާ ވިނީޝިއުސް ޖޫނިއާ، ކީލިއަން އެމްބާޕޭ، ޖޫޑް ބެލިންހަމް، ފެޑެރީކޯ ވަލްވޭޑޭ، ޓޯނީ ކްރޫސް އަދި ޑެނީ ކާވަހާލް ހިމެނެއެވެ. މީގެ އިތުރުން މެންޗެސްޓާ ސިޓީގެ އާލިން ހާލަންޑް އަދި ބަޔާ ލެވަކޫސަންގެ ފްލޯރިއަން ވާޓްޒް ވެސް ހިމެނެއެވެ.

ފީފާ އެވޯޑްތަކަށް ސަޕޯޓަރުންގެ ވޯޓަށް ހުޅުވާލައިފައިވާއިރު، އަންނަ މަހުގެ 10 ވަނަ ދުވަހުގެ ނިޔަލަށް ފީފާ ވެބްސައިޓް މެދުވެރިކޮށް ވޯޓު ލެވޭނެއެވެ.

މި ފަހަރުގެ ނޮމިނީސްގެ ތެރޭގައި މިދިޔަ ސީޒަނުގައި އިންޑިވިޖުއަލީ މޮޅު ކުޅުމެއް ދެއްކި އިންޓަ މިލާންގެ ލަޓައުރޯ މާޓީނޭޒް އާއި ލިވަޕޫލްގެ މުހައްމަދު ސަލާހު ނުހިމެނެއެވެ.

އެންމެ މޮޅު ކޯޗުގެ މަޤާމަށް ވާދަކުރަނީ މެންޗެސްޓާ ސިޓީގެ ޕެޕް ގާޑިއޯލާ، ރެއާލް މެޑްރިޑްގެ ކާލޯ އަންޗެލޮޓީ، ބަޔާ ލެވަކޫސަންގެ ޒަބީ އަލޮންސޯ، އާޖެންޓީނާގެ ލިއޮނަލް ސްކަލޯނީ އަދި ސްޕެއިންގެ ލުއިސް ޑެ ލަ ފުއެންޓޭއެވެ.