ފަލަސްތީނުގެ ޙައްޤުގައި ދުނިޔެ އެއްބައިވުމަށް ރައީސް މުޢިއްޒު ގޮވާލައްވައިފި

ރައީސް މުއިއްޒާއި ފަލަސްތީނުގެ ރައީސް

އިސްރާއީލުގެ އިސްތިއުމާރު ނިމުމަކަށް ގެނެސް، ފަލަސްތީނުގެ ރައްޔިތުންނާ ދެކޮޅަށް ގަތުލުއާންމު ހިންގަމުންދާ ފަރާތްތައް އިންސާފުގެ ކުރިމައްޗަށް ގެންނަންޖެހޭ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ ފަލަސްތީނުގެ ރައްޔިތުންނާ އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހާ ގުޅިގެން ދެއްވި ޚާއްޞަ މެސެޖެއްގައެވެ.

ރައީސް މުޢިއްޒުގެ މެސެޖުގައި، ފަލަސްތީނުގެ ޙައްޤުގައި ރާއްޖެއިން ދޭ އެއްބާރުލުމަކީ ރާއްޖޭގެ އެންމެހާ ރައްޔިތުން ހިއްސާކުރާ ކަމެއްކަން ފާހަގަކުރައްވައި، ފަލަސްތީނުގެ ރައްޔިތުން ކުރިމަތިލަމުންދާ އަނިޔާވެރިކަމާއި ފަސާދައިގެ މައްޗަށް އަލިއަޅުއްވާލައްވާފައިވެއެވެ.

އިޒްރޭލަށް ހަތިޔާރު ވިއްކުން ހުއްޓާލުމަށާއި، ހަނގުރާމައިގެ ޖަރީމާތަކުގައި ޒިންމާވާންޖެހޭ ފަރާތްތައް ޖަވާބުދާރީ ކުރުވުމަށް ބައިނަލްއަޤްވާމީ މުޖުތަމަޢުން އެއްބައިވުމަށް ރައީސް މުޢިއްޒު ގޮވާލައްވާފައިވެއެވެ. އަދި ފަލަސްތީނުގެ ރެފިއުޖީންގެ ޙައްޤުގައި އދ.ގެ ރިލީފް އެންޑް ވޯކްސް އެޖެންސީ (ޔޫ.އެން.އާރު.ޑަބްލިއު.އޭ) އަދާކުރަމުންދާ މުހިންމު ދައުރަށް އެއްބާރުލުން ދިނުމަށްވެސް އެދިވަޑައިގެންފައިވެއެވެ.

އިޒްރޭލުން ހިންގަމުންދާ ލާއިންސާނީ ޤަތުލުއާންމުގެ ޖަރީމާތައް ކުށްވެރިކުރައްވައި، މިއީ މުޅި ދުނިޔޭގެ ގުޅިފައިވާ ނިޒާމަށް ދެވޭ ޙަމަލާއެއްކަމުގައި ރައީސް މުޢިއްޒު ސިފަކުރައްވާފައިވެއެވެ. އަދި ފަލަސްތީނުގެ ރައްޔިތުންގެ ޙައްޤުތައް ޙިމާޔަތްކޮށް، އިޒްރޭލު ޖަވާބުދާރީ ކުރުވަން ޖެހޭކަމަށް ތަކުރާރުކުރައްވާފައިވެއެވެ.

ރައީސް މުޢިއްޒުގެ މެސެޖުގައި، ފަލަސްތީނުގެ މިނިވަންކަމަށް ކުރެވޭ މަސައްކަތަކީ އެންމެ މުހިންމު ކަމެއްކަމުގައި ރާއްޖެއިން ދެކޭކަމާއި، ފަލަސްތީނު ރައްޔިތުންގެ ޖިހާދަކީ ދިވެހިންގެ އަމިއްލަ ކަމެއްގެ ގޮތުގައި ބަލައިގަންނަކަން ފާހަގަކުރައްވާފައިވެއެވެ. އަދި ފަލަސްތީނުގެ ޙައްޤުގައި ދުނިޔޭގެ ކުރިމަތީގައި ސާބިތުކަމާއެކު އަޑުއުފުލުމުގައި ދިވެހިން ދެމިތިބޭނެކަމުގެ ޔަޤީންކަންވެސް ދެއްވާފައިވެއެވެ.

ކޮމެންޓް

Dheli logo

Copyright © 2024 Dheli Online · Terms and Conditions · Privacy Policy