އިމިގްރޭޝަންގެ ފަސް މުވައްޒަފަކާ މެދު ތަޙުޤީޤު ފަށައިފި

ބިދޭސީންނާ ގުޅުން ހުރި ކަންތައްތަކެއް ކޮށް ނަހަމަ ގޮތުގައި ފައިސާ ހޯދިކަމުގެ ތުހުމަތުގައި މޯލްޑިވްސް އިމިގްރޭޝަންގެ ފަސް މުވައްޒަފަކާ މެދު ތަޙުޤީޤެއް ފަށައިފިއެވެ.

މިކަން ހާމަކުރައްވާފައި ވަނީ ހޯމް މިނިސްޓަރު އަލީ އިހްސާން ރޭ ކުރެއްވި އެކްސްގައި ޕޯސްޓެއްގައެވެ.

މި މައްސަލައާ ގުޅޭ ގޮތުން އިތުރު ތަފްސީލު ދެއްވަމުން އިހްސާން ވިދާޅުވީ، އެ މުވައްޒަފުންގެ މަޢުލޫމާތު ލިބުމާ އެކު މޯލްޑިވްސް ޕޮލިސް ސަރވިސް މެދުވެރިކޮށް ތަޙުޤީޤު ފަށާފައިވާ ކަމަށެވެ. އެހެންނަމަވެސް، އެ މުވައްޒަފުން މިހާރު ތިބީ މަސައްކަތުން އެކަހެރިކޮށްފައިކަން ނުވަތަ ނޫންކަން އެ ޕޯސްޓުގައި ބަޔާންކޮށްފައެއް ނުވެއެވެ.

"ޔުނިފޯމު އެޅި މުއައްސަސާތަކުގެ ތެރޭގައި ތިބެ ޔުނިފޯމުގެ ހުރުމަތްކަނޑާ، ރައްޔިތުންގެ ކުރިމަތީ މުއައްސަސާތަކުގެ އިތުބާރު ގެއްލުވަމުންދާ ފަރާތްތަކާ ދޭތެރޭ ގާނޫނީ ގޮތުން އެޅޭ އެންމެ ހަރުކަށި ފިޔަވަޅު އެޅުމަކީ ރައީސުލްޖުމްހޫރިއްޔާ އަޅުގަނޑަށް އަންގަވާފައިވާ ކަމެއް،" އިހުސާން ވިދާޅުވިއެވެ.

މިނިސްޓަރު އިހްސާން އިތުރަށް ވިދާޅުވީ، ތަޙުޤީޤު ކުރިއަށްދާ ވަރަކަށް ކަމާ ބެހޭ އިދާރާތަކުން މި މައްސަލައިގެ އިތުރު ތަފްސީލު ހާމަކުރާނެ ކަމަށެވެ.

މި މައްސަލަ ހާމަވެފައިވަނީ، ރާއްޖޭގައި ގަވާއިދާ ޚިލާފަށް އުޅޭ ބިދޭސީން ހޯދައި ފޮނުވާލުމުގެ އޮޕަރޭޝަނެއް ސަރުކާރުން ހިންގަމުންދާ ދަނޑިވަޅެއްގައެވެ. މި އޮޕަރޭޝަންގެ ދަށުން މިހާތަނަށް އެތައް ހާސް ބިދޭސީއެއް ވަނީ އަނބުރާ އެމީހުންގެ ޤައުމުތަކަށް ފޮނުވާލާފައެވެ.

މި މައްސަލައިގައި ތުހުމަތުކުރެވޭ އިމިގްރޭޝަންގެ މުވައްޒަފުންގެ ޢަމަލުތަކަކީ، ބިދޭސީންނާ ގުޅުންހުރި ކަންކަމުގައި ސަރުކާރުން ގެންގުޅޭ ސިޔާސަތުތަކަށް ހުރަސްއެޅޭ ފަދަ ކަންކަން ކަމަށް ބެލެވެއެވެ. މި މައްސަލައިގެ ތަޙުޤީޤު ނިމި، ކަމާ ގުޅޭ އިތުރު މަޢުލޫމާތު ލިބުމުން އާންމުކުރާނެ ކަމަށް ހޯމް މިނިސްޓްރީން ބުނެފައިވެއެވެ.