އެސްޓީއޯގެ ދަށަށް ފެނަކަ ބަދަލުކުރުމުގެ މަސައްކަތް ހުއްޓާލައިފި

އެސްޓީއޯގެ ދަށަށް ފެނަކަ ބަދަލުކުރަން ކުރަމުން އައި މަސައްކަތް އެސްޓީއޯއިން ހުއްޓާލައިފި އެވެ.

މިކަން މިގޮތަށް ނިންމާފައި ވަނީ ފިނޭންސް މިނިސްޓްރީން އެކަން އެގޮތަށް ނުކުރުރުމަސް އެންގުމާއި ގުޅިގެންނެވެ.  

އެސްޓީއޯއިން މައުލޫމާތު ދީފައިވާ ގޮތުގައި، ފެނަކަ އެ ކުންފުނީގެ ދަށަށް ބަދަލުކުރުމުގެ މަސައްކަތް ހުއްޓާލުމަށް ފިނޭންސް މިނިސްޓްރީން އަންގާފައިވަނީ މި މަހުގެ 24 ވަނަ ދުވަހު އެވެ. މި އެންގުމާ ގުޅިގެން، އެސްޓީއޯގެ ޑިރެކްޓަރުންގެ ބޯޑުން ވަނީ ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް ނިންމާފައެވެ.

އެސްޓީއޯގެ ދަށަށް ފެނަކަ ބަދަލުކުރުން ހުއްޓާލި ނަމަވެސް، އެ ކުންފުނީގެ ހާލަތު ރަނގަޅުކުރުމަށް އެހެން ގޮތެއް ހޯދަމުން އަންނަ ކަމަށް ފިނޭންސް މިނިސްޓްރީން ބުނެފައި ވެއެވެ. އޭގެ ތެރޭގައި އެސްޓީއޯގެ ބަދަލުގައި ސްޓެލްކޯގެ ދަށަށް ފެނަކަ ގެންދިއުން ފަދަ ހައްލެއް ހޯދުމުގެ މަސައްކަތް ކުރަމުންދާ ކަމަށް ވެސް ބުނެފައިވެ އެވެ.

ފެނަކަ އެސްޓީއޯގެ ދަށަށް ބަދަލުކުރުމަށް ސަރުކާރުން ނިންމާފައިވަނީ މިދިޔަ އޯގަސްޓް މަހުގެ ތެރޭގައެވެ. މި ނިންމުން ނިންމީ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފެނަކައިގެ ދަރަނި އިތުރުވެ، ކުންފުނީގެ މުވައްޒަފުންގެ އަދަދު ބޮޑުތަނުން މަތިވެ، މާލީ މައްސަލަތަކެއްގެ ތެރެއަށް ވެއްޓިފައިވާތީ އެވެ.

މި ހާލަތުގައި، ހަރަދު ކުޑަކުރުމުގެ ގޮތުން ފެނަކައިން އަންނަނީ ކޮންޓްރެކްޓްގެ ދަށުން ނަގާފައި ހުރި މުވައްޒަފުން ވަކިކުރަމުންނެވެ. އެގޮތުން މިހާތަނަށް 900 އަށް ވުރެ ގިނަ މުވައްޒަފުން ވަކިކޮށްފައިވާ ކަމަށް ފެނަކައިން ބުނެފައިވެ އެވެ.