މޯލްޑިވްސް ޕޮލިޓެކްނިކް ޒަމާނީކޮށް ރީބްރޭންޑް ކުރުމަށް ސަރުކާރުން ނިންމައިފި

މޯލްޑިވްސް ޕޮލިޓެކްނިކް ޒަމާނީކޮށް ރީބްރޭންޑް ކުރުމަށް ސަރުކާރުން ނިންމާފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.

މިނިސްޓަރ މާރިޔާ މިފަދައިން ވިދާޅުވެފައި ވަނީ ޕީއެސްއެމް ނިއުސްގެ "ހަފުތާ 52" ޕްރޮގުރާމްގައި ވާހަކަފުޅުދައްކަވަމުންނެވެ.

ވަޒީރު ޑރ. މާރިޔާ ވިދާޅުވި ގޮތުގައި މިހާރުގެ ޒުވާނުން ބޭނުންވަނީ އުފާވެރި މާހައުލެއްގައި ކިޔެވޭނެ މަގު ތަނަވަސްވުމަށެވެ. ނަމަވެސް މިހާރު ޕޮލިޓެކްނިކްގައި އެފަދަ އިންތިޒާމްތަކެއް ހަމަޖެހިފައި ނުވާކަމަށް އެކަމަނާ ފާހަގަކުރެއްވިއެވެ. އެހެންކަމުން، ޕޮލިޓެކްނިކް އިތުރަށް ތަރައްޤީކޮށް، ޒުވާނުންނަށް އުފާވެރި މާހައުލެއްގައި ކިޔެވުމުގެ ފުރުސަތު ފަހިކޮށްދިނުމަށް ވަނީ ނިންމާފައެވެ.

ޕޮލިޓެކްނިކް ޒަމާނީކުރުމުގެ ތެރޭގައި، އެންމެ ފަހުގެ މޮޑެލްތަކާއި ޒަމާނީ ވަސީލަތްތައް ބޭނުންކޮށްގެން ކިޔަވައިދިނުމަށް ވަނީ ރޭވިފައެވެ. މީގެ އިތުރުން، ކިޔަވައިދިނުމުގައި ޓެކްނޮލޮޖީގެ އެކި ވަސީލަތްތަކުގެ ބޭނުން ހިފުމާއި، އޮންލައިންކޮށް ކިޔަވައިދިނުމުގެ ފުރުސަތު ޤާއިމުކުރުމަށްވެސް ވިސްނާފައިވާކަމަށް ވަޒީރު ވިދާޅުވިއެވެ.

މޯލްޑިވްސް ޕޮލިޓެކްނިކަކީ 2010 ވަނަ އަހަރު އުފައްދާފައިވާ، ރާއްޖެއަށް ބޭނުންވާ ހުނަރުވެރި މަސައްކަތްތެރިން ތަމްރީނު ކުރުމަށް އަމާޒުކޮށްފައިވާ މުއައްސަސާއެކެވެ. މި މުއައްސަސާއިން ސެޓްފިކެޓް ލެވެލުން ފެށިގެން ޑިޕްލޮމާއާ ހަމައަށް ކިޔެވުމުގެ ފުރުޞަތު ދެމުންދާއިރު، ރާއްޖޭގެ އެކި ސަރަހައްދުތަކުގައި ކެމްޕަސްތައް ޤާއިމުކޮށްގެން ޒުވާނުން ތަމްރީނުކުރުމުގެ މަސައްކަތް ކުރިއަށްދެއެވެ.