ބާސެލޯނާގެ ޒުވާން ތަރި ލަމީން ޔަމާލް ޔޫރަޕިއަން ގޯލްޑަން ބޯއި އެވޯޑް ހޯދައިފި

ގޯލްޑަން ބޯއީ އެވޯޑް ހޯދި އެންމެ ޒުވާންކުޅުންތެރިޔާޔަމާލް

ބާސެލޯނާ އަދި ސްޕެއިނުގެ ވިންގަރ ލަމީން ޔަމާލް ޔޫރަޕިއަން ގޯލްޑަން ބޯއި އެވޯޑް ހާސިލްކޮށްފިއެވެ.

މިއީ ޔޫރަޕްގެ 21 އަހަރުން ދަށުގެ އެންމެ މޮޅު ކުޅުންތެރިޔާއަށް ދޭ އެވޯޑެކެވެ.

އުމުރުން 17 އަހަރުގެ ޔަމާލްއަކީ މި އެވޯޑް ހާސިލްކުރި އެންމެ ޅަ ކުޅުންތެރިޔާއެވެ. އޭނާ މި އެވޯޑް ހޯދިއިރު އުމުރަކީ 17 އަހަރާއި ހަތަރު މަސްދުވަހެވެ. ޔަމާލް މި އެވޯޑް ހޯދީ ތުރުކީގެ އާރދާ ގުލާ އާއި ފްރާންސްގެ ވަރެން ޒަޔަރް-އެމެރީ ފަހަތަށް ޖައްސާލައިގެންނެވެ.

ޔަމާލްއަކީ މިދިޔަ މަހު ބޭއްވުނު ބެލަންޑިއޯ އެވޯޑްގައި އަހަރުގެ އެންމެ މޮޅު ޒުވާން ކުޅުންތެރިޔާއަށް ދޭ ކޯޕާ ޓްރޮފީ ވެސް ހާސިލްކުރި ކުޅުންތެރިޔާއެވެ. އަދި އޭނާ ވަނީ އެންމެ ފަހުން ބޭއްވުނު ޔޫރޯ ފުޓްބޯޅަ މުބާރާތުގައި ސްޕެއިން ކާމިޔާބު ހޯދުމުގައި މުހިންމު ދައުރެއް އަދާކޮށްފައެވެ.

މި ސީޒަނުގައި ވެސް ޔަމާލް ދަނީ ރަނގަޅު ފޯމެއްގައި ކުޅެމުންނެވެ. ސްޕެނިޝް ލީގުގައި މިހާތަނަށް ކުޅުނު 12 މެޗުގައި އޭނާ ވަނީ ފަސް ލަނޑު ޖަހާފައެވެ. ޔަމާލްއަކީ ގާވީ، ޕެޑްރީ އަދި މެސީގެ ފަހުން މި އެވޯޑް ކާމިޔާބުކުރި ބާސެލޯނާގެ ހަތަރުވަނަ ކުޅުންތެރިޔާއެވެ.

ޔޫރަޕިއަން ގޯލްޑަން ބޯއި އެވޯޑަކީ އިޓަލީގެ ނޫހެއް ކަމަށްވާ ޓުޓޯ ސްޕޯޓްއިން 2003 ވަނަ އަހަރުން ފެށިގެން ކޮންމެ އަހަރަކު ދެމުން އަންނަ އެވޯޑެކެވެ. މީގެ ކުރިން މި އެވޯޑް ހާސިލްކޮށްފައިވާ ފާހަގަކޮށްލެވޭ ކުޅުންތެރިންގެ ތެރޭގައި ކިލިއަން އެމްބާޕޭ، ނޭމާ، އެޑިންސަން ކަވާނީ އަދި ޕައުލް ޕޮގްބާ ފަދަ ބޮޑެތި ތަރިން ހިމެނެއެވެ.

ބާސެލޯނާ ސްޕެއިން