ލިވަޕޫލުން ރެއާލް މެޑްރިޑް ބަލިކޮށް ޗެމްޕިއަންސް ލީގުގައި އަނެއްކާވެސް އެއްވަނައަށް

ޔުއެފާ ޗެމްޕިއަންސް ލީގުގައި ރޭ ކުޅުނު މެޗުގައި ލިވަޕޫލުން ރެއާލް މެޑްރިޑް 2-0 އިން ބަލިކޮށް، މި ފަހަރުގެ މުބާރާތުގައި ސައްތަ އިން ސައްތަ ރެކޯޑް ދަމަހައްޓައި އަލުން އެއްވަނަ މަގާމަށް ޖެހިލައިފިއެވެ.

މިއީ 15 އަހަރު ތެރޭ ލިވަޕޫލުން ރެއާލްގެ މައްޗަށް ހޯދި ފުރަތަމަ މޮޅެވެ. އެންމެ ފަހުން ލިވަޕޫލުން ރެއާލް ބަލިކުރީ 2009 ވަނަ އަހަރުއެވެ. އޭގެ ފަހުން މި ދެ ޓީމު ކުޅުނު އަށް މެޗުގެ ތެރެއިން ދެ މެޗަކީ ޗެމްޕިއަންސް ލީގުގެ ފައިނަލުގައި ބަލިވި މެޗުތަކެވެ.

ލިވަޕޫލްގެ އެންފީލްޑް ސްޓޭޑިއަމްގައި ކުޅުނު ރޭގެ މެޗުގައި ލިވަޕޫލަށް ލީޑުނެގީ ދެވަނަ ހާފުގައި އަލެކްސިސް މެކް އަލިސްޓާ ޖެހި ގޯލުންނެވެ. ރެއާލަށް އެއްވަރުކޮށްދޭން ލިބުނު ޕެނަލްޓީއެއް ކީލިއަން އެމްބާޕޭ ފޮނުވާލުމުން، ލިވަޕޫލްގެ ކީޕަރު ކޮއިމްހިން ކެލަހާ ވަނީ މަތަކޮށްފައެވެ.

ލިވަޕޫލަށް ތިން ޕޮއިންޓް ޔަގީންކޮށްދިން ދެވަނަ ގޯލު ޖެހީ ބަދަލަކަށް ކުޅެން އެރި ކޯޑީ ގަކްޕޯ ބޮލުންނެވެ.

މި މޮޅާ އެކު ލިވަޕޫލް ޗެމްޕިއަންސް ލީގުގެ ލީގު ބުރުގެ އެއްވަނައިގައި އޮތީ ފަސް މެޗުން ވެސް މޮޅުވެ 15 ޕޮއިންޓާ އެކުގައެވެ. މި ފަހަރުގެ ޗެމްޕިއަންސް ލީގުގައި ކުޅުނު ހުރިހާ މެޗަކުން މޮޅުވި ހަމައެކަނި ޓީމަކީ ލިވަޕޫލްއެވެ.

އެންމެ ފަހުގެ ޗެމްޕިއަން ރެއާލް މި ފަހަރުގެ ޗެމްޕިއަންސް ލީގުގައި ކުޅުނު ފަސް މެޗުގެ ތެރެއިން ތިން މެޗުން ބަލިވިއިރު، ހަ ޕޮއިންޓާ އެކު އެ ޓީމު އޮތީ 36 ޓީމުގެ ލީގު ބުރުގެ 24 ވަނައިގައެވެ.