އުމުރުން 18 އަހަރުން ދަށުގެ ކުއްޖަކު 4 އަހަރުގެ ކުއްޖަކަށް ޖިންސީ ގޯނާކުރި މައްސަލައެއް ބަލަނީ

މެދު ރާއްޖެތެރޭގެ އަތޮޅެއްގައި 18 އަހަރުން ދަށުގެ ފިރިހެން ކުއްޖަކު ހަތަރު އަހަރުގެ އަންހެން ކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައެއް ފެންމަތިވެއްޖެއެވެ.

މިކަމާއި ގުޅިގެން ދިވެހި ފުލުހުން ބުނެފައިވަނީ، ކ، އއ، އދ، އަދި ވ އަތޮޅުގައި ހިމެނޭ ރަށެއްގައި މި މައްސަލަ މިދިޔަ ބުރާސްފަތި ދުވަހު ރިޕޯޓުކޮށްފައިވާ ކަމަށެވެ. ނަމަވެސް ކުޑަކުދީންނާ ގުޅޭ މިފަދަ މައްސަލަތަކަކީ ސީރިއަސް މައްސަލަތަކަކަށް ވާތީ ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން ކުއްޖާގެ އަތޮޅާއި ރަށް ހާމަނުކުރާ ކަމަށް ފުލުހުން ބުނެފައިވެއެވެ.

މި މައްސަލަ މިހާރު ފުލުހުން އަންނަނީ ތަހުގީގު ކުރަމުންނެވެ.

މިފަހުން މި ވަނީ ޖިންސީ ގޯނާގެ މައްސަލަތައް ފެންމަތިވާ މިންވަރު އިތުރުވެފައެވެ. މިގޮތުން، މ، ފ، ދ، ތ ނުވަތަ ލ. އަތޮޅުގެ ތެރެއިން އަތޮޅެއްގައި ހިމެނޭ ރަށެއްގައި އުމުރުން 10 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް މިމަހުގެ 25ގައި ފުލުހުންނަށް ރިޕޯޓުކޮށްފައިވެއެވެ.

އެ މައްސަލާގައި 51 އަހަރުގެ މީހަކު ހައްޔަރުކޮށްފައިވާއިރު، އޭނާގެ ބަންދަށް ކޯޓުން ވަނީ 30 ދުވަސް ޖަހާފައެވެ.