ރައްޔިތުން މަޖިލީހުގެ ބަޖެޓް ކޮމިޓީން 2025 ވަނަ އަހަރުގެ ބަޖެޓް ފާސްކޮށްފި

ރައްޔިތުންގެ މަޖިލީހުގެ ބަޖެޓް ކޮމިޓީން 2025 ވަނަ އަހަރަށް ސަރުކާރުން ހުށަހަޅާފައިވާ 56.6 ބިލިއަން ރުފިޔާގެ ބަޖެޓް ފާސްކޮށްފިއެވެ.

މި ބަޖެޓަކީ މި އަހަރުގެ ބަޖެޓަށްވުރެޓަށްވުރެ 1.6 ބިލިއަން ރުފިޔާ އިތުރު އަދަދެކެވެ.

މިއަދު މެންދުރުފަހު ބޭއްވުނު ބަޖެޓް ކޮމިޓީގެ ބައްދަލުވުމުގައި ބައިވެރިވި 19 މެންބަރުންގެ ތެރެއިން 15 މެންބަރުން ވަނީ ބަޖެޓް ފާސްކުރުމަށް ވޯޓު ދެއްވާފައެވެ. ކޮމިޓީން ބަޖެޓް ފާސްކޮށްފައިވަނީ އިތުރު ބަދަލެއް ނުގެނައި ނަމަވެސް މަޝްރޫޢުތަކުގެ ތަފްސީލު މަޖިލީހަށް ދިނުމަށް ޝަރުތުކޮށްފައެވެ.

އަންނަ އަހަރުގެ ބަޖެޓުގައި އާމްދަނީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު، އޭގެ ތެރެއިން 2.6 ބިލިއަން ރުފިޔާއަކީ ހިލޭ އެހީއެވެ. ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް 12.4 ބިލިއަން ރުފިޔާ ކަނޑައަޅާފައިވާއިރު، ރިކަރަންޓް ޚަރަދުގެ ގޮތުގައި 36 ބިލިއަން ރުފިޔާ ހިމަނާފައިވެއެވެ.

ބަޖެޓް ކޮމިޓީން ވަނީ ބަޖެޓާ ގުޅޭ ގޮތުން ބައެއް ރިކޮމެންޑޭޝަންތައް ހުށަހަޅާފައެވެ. އޭގެ ތެރޭގައި ޕީއެސްއައިޕީއަށް ހުށަހަޅާ ޕްރޮގްރާމްތައް ކްރައިޓީރިއާތަކަށް ރިއާޔަތްކޮށްގެން ތަރުތީބު ކުރުމާއި، އަމަލީ މަސައްކަތް ނިންމާނެ ކަމުގެ ލިސްޓެއް އަންނަ އަހަރުގެ ފެބްރުއަރީ މަހުގެ ކުރިން މަޖިލީހަށް ފޮނުވުން ހިމެނެއެވެ.

މީގެ އިތުރުން، ސަރުކާރު ކުންފުނިތަކުން ދައުލަތުގެ ބަޖެޓަށް ބަރޯސާވާ މިންވަރު ކުޑަ ކުރުމަށާއި އެސްއޯއީތައް އިސްލާހު ކުރުމަށް ވެސް ކޮމިޓީން ވަނީ ލަފާ ދީފައެވެ. އަދި ޓެކްސް ގާނޫނުގެ ދަށުން ފައިސާ ނުދައްކާ ފަރާތްތަކާ މެދު މީރާއިން އަޅާ ފިޔަވަޅުތައް މުރާޖައާކޮށް، ދިމާވާ ދަތިތައް ކުޑަ ކުރުމަށް ޓެކްސް ނެގުމާ ބެހޭ އިދާރީ ގާނޫނަށް އިސްލާހު ހުށަހެޅުމަށްވެސް ކޮމިޓީން ވަނީ ހުށަހަޅާފައެވެ.