ރާއްޖޭގެ އަރބަން ސަރަޙައްދުތައް ތަރައްޤީކުރުމަށް އައު ޤާނޫނެއް ފާސްކޮށްފި

ރާއްޖޭގައި އަރބަން ސަރަޙައްދުތައް ތަރައްޤީކުރުމާ ގުޅޭ އައު ޤާނޫނެއް ރައްޔިތުންގެ މަޖިލީހުން މިއަދު ފާސްކޮށްފިއެވެ.

މި ބިލަކީ ސަރުކާރުގެ ފަރާތުން ވިލިނގިލި ދާއިރާގެ މެންބަރު ޢާޒިމް ޢަބްދުލްޢަޒީޒް ހުށަހެޅުއްވި ބިލެކެވެ. މި ބިލު ފާސްކުރުމަށް ޖަލްސާގައި ބައިވެރިވި 70 މެންބަރުން ވޯޓު ދެއްވާފައިވެއެވެ.

މި ޤާނޫނުގެ މައިގަނޑު މަޤްޞަދަކީ ރާއްޖޭގެ އަރބަން ސަރަޙައްދުތައް ކަނޑައެޅުމާއި، އެފަދަ ސަރަޙައްދުތައް ތަރައްޤީކުރުމާ ގުޅޭ ކަންކަން ހަރުދަނާ އަދި ޤާނޫނީ އޮނިގަނޑެއްގެ ދަށުން އިންތިޒާމްކުރުމެވެ. މީގެ ތެރޭގައި އަރބަން ސަރަޙައްދުތަކުގެ ޒޯންތަކާއި ގިންތިތައް ކަނޑައެޅުމާއި، ބިމުގެ ބޭނުން ކަނޑައެޅުމާއި، ތަރައްޤީކޮށް ހިންގުމުގެ އުސޫލުތަކާއި، އެ ސަރަޙައްދުތަކުގައި ހިންގާ މަޝްރޫޢުތައް މޮނިޓަރކޮށް ފިޔަވަޅު އެޅުމާ ބެހޭ އުސޫލުތައް ހިމެނެއެވެ.

މި ޤާނޫނުގެ ދަށުން، އަރބަން ސަރަޙައްދުތައް ކަނޑައެޅުމާއި ތަރައްޤީކޮށް ހިންގުމާ ބެހޭ ޤައުމީ ސިޔާސަތެއް އެކުލަވާލަންޖެހޭނެއެވެ. މި ސިޔާސަތު އެކުލަވާލާނީ ވަޒީރުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާއެވެ. އަދި މި ޤާނޫނު ތަންފީޛުކުރުމުގެ އިސް ޒިންމާ ނަގާނީ އުމްރާނީ ތަރައްޤީގެ މަސްއޫލިއްޔަތު ޙަވާލުކުރެވިފައިވާ ވުޒާރާއިންނެވެ.

މި ޤާނޫނުގެ ދަށުން "އަރބަން ޑިވެލޮޕްމަންޓް އޮތޯރިޓީ" ގެ ނަމުގައި ސަރުކާރުގެ އިދާރާއެއް އުފައްދަންޖެހޭނެއެވެ. މި އޮތޯރިޓީ އުފެދުމާއެކު، މިހާރު އުމްރާނީ ތަރައްޤީއާ ބެހޭ ވުޒާރާގެ ދަށުން ހިންގާ އަރބަން ޑިވެލޮޕްމަންޓް ޑިޕާޓްމަންޓުގެ މުވައްޒަފުންނާއި ޒިންމާތައް މި އޮތޯރިޓީއަށް ބަދަލުވާނެއެވެ. ނަމަވެސް އޮތޯރިޓީ ހިންގާނީ އެ ވުޒާރާގެ ދަށުންނެވެ.

ރާއްޖޭގައި އަރބަން ސަރަޙައްދުގެ ގޮތުގައި މެޓްރޮޕޮލިޓަން އޭރިއާތަކާއި، އަރބަން ރީޖަން އަދި އަރބަން ސެންޓަރު ހިމެނޭ ހިމެނޭ ތިން ބާވަތުގެ ސަރަޙައްދުތަކެއް ކަނޑައެޅިދާނެއެވެ. ނަމަވެސް، ހިމާޔަތްކޮށްފައިވާ ސަރަޙައްދުތަކާއި އާސާރީ ސަރަޙައްދުތަކާއި ގުދުރަތީ ލޭންޑްސްކޭޕާއި ހިމާޔަތްކުރަންޖެހޭ ގަސްގަހާގެއްސާއި ގުދުރަތީ ވަސީލަތްތައް ތަރައްޤީކުރުން މި ޤާނޫނުގެ ދަށުން މަނާކުރެވިފައިވެއެވެ.