ރާއްޖޭގައި ހެލިކޮޕްޓަރު އޮޕަރޭޓްކުރަން އަންނަ އަހަރު މާރިޗުގައި ފަށާނެ: ވަޒީރު އަމީން

އަންނަ އަހަރުގެ މާރިޗު މަހުގެ ތެރޭގައި ރާއްޖޭގައި ހެލިކޮޕްޓަރު އޮޕަރޭޓްކުރަން ފަށާނެ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ޕީއެސްއެމް ނިއުސްގެ "ހަފްތާ 52" ޕްރޮގްރާމުގައި ވާހަކަފުޅު ދައުޅު ދައްކަވަމުން ވަޒީރު އަމީން ވިދާޅުވީ، ކުރިއަށް އޮތް 10 ނުވަތަ 15 ދުވަސް ތެރޭގައި ހެލިކޮޕްޓަރު އޮޕަރޭޓްކުރާ ފަރާތަކާއެކު އެއްބަސްވުމުގައި ސޮއިކުރާނެ ކަމަށެވެ.

ވަޒީރު އަމީން ވިދާޅުވީ، ރާއްޖޭގައި ހެލިކޮޕްޓަރު އޮޕަރޭޓްކުރާނީ އިނގިރޭސިވިލާތުގެ ސިވިލް އޭވިއޭޝަން އޮތޯރިޓީގެ ރެކޮމެންޑޭޝަންތަކާ އެއްގޮތަށް، ސަލާމަތީ ގޮތުން އެންމެ ރަނގަޅު ފެންވަރުގެ ހެލިކޮޕްޓަރުތަކުން ކަމަށެވެ. މި ޚިދުމަތް ފެށުމުން އެއް ރަށުން އަނެއް ރަށަށް ނުވަތަ މާލެއަށް ބަލިމީހުން ގެނައުމަށާއި، ރޭގަނޑު ޓޫރިސްޓުން އުފުލުމުގައި ދިމާވާ ދަތިތަކަށް ޙައްލު ލިބިގެންދާނެ ކަމަށް ވަޒީރު ފާހަގަކުރެއްވިއެވެ.

މި ޚިދުމަތް ފެށުމަށްޓަކައި މިދިޔަ އޮގަސްޓް މަހު ޝައުގުވެރިވާ ފަރާތްތަކަށް ހުޅުވާލި ފުރުސަތުގައި ބައިނަލްއަޤްވާމީ 36 ކުންފުންޏަކުން ޝައުގުވެރިކަން ފާޅުކޮށްފައިވާކަން ފާހަގަކޮށްލެވެއެވެ. މި ކަމަކީ ރާއްޖޭގެ ދަތުރުފަތުރުގެ ނިޒާމަށް އަންނާނެ ބޮޑު ކުރިއެރުމެއް ކަމަށް ބެލެވެއެވެ.