ޕްރޮޖެކްޓްތައް ނުހިންގާ އެޑްވާންސް ފައިސާ ނަގައިގެން ވިޔަފާރިކުރާ ކުންފުނިތަކެއް އުޅޭ: މިނިސްޓަރު

އިންފްރާސްޓްރަކްޗަރު މިނިސްޓަރު، ޑރ. އަބްދުﷲ މުއްތަލިބު

ސަރުކާރުން ހިންގަން އިއުލާންކުރާ ބައެއް ޕްރޮޖެކްޓްތައް ހޯދުމަށްފަހު އެޑްވާންސް ފައިސާ ނަގައިގެން އެ ޕްރޮޖެކްޓް ނުހިންގާ އަމިއްލަ ވިޔަފާރި ކުރާ ކުންފުނިތަކެއް އުޅޭ ކަމަށް އިންފްރާސްޓްރަކްޗަރު މިނިސްޓަރު، ޑރ. އަބްދުﷲ މުއްތަލިބު ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

މިނިސްޓަރު މުއްތަލިބު ވިދާޅުވީ 2023 ވަނަ އަހަރާއި އޭގެ ކުރިން ވެސް ދައުލަތުން ހިންގާ އެކި ޕްރޮޖެކްޓްތައް ބިޑްކޮށްގެންނާއި އެހެން ގޮތްގޮތުން ހޯދައިގެން އެޑްވާންސް ޕޭމަންޓް ނެގުމަށްފަހު ފިލާ ކުންފުނިތަކެއް އުޅޭ ކަމަށެވެ. އޭނާ ވިދާޅުވީ މި ކުންފުނިތަކުން ދައުލަތުގެ ފައިސާ ނަގައިގެން އަމިއްލަ ވިޔަފާރި ކުރާ ކަމަށާއި، މިއީ ދައުލަތަށް ވަރަށް ބޮޑު ގެއްލުމެއް ކަމަށެވެ.

މި މައްސަލައާ ގުޅިގެން، ނިމިދިޔަ އެމްޑީޕީގެ ވެރިކަމުގައި އެ ޕާޓީގެ މަޖިލިސް މެންބަރުންނާއި ޕާޓީގެ އެހެން އިސް ބޭފުޅުންނަށް ސަރުކާރުގެ ގިނަ ޕްރޮޖެކްޓްތަކެއް ދީގެން ވަރަށް ބޮޑެތި ނަފާތަކެއް ނެގި ކަމަށް ގިނަ ތުހުމަތުތައް ކުރެވިފައިވެއެވެ. ފެނަކަ ފަދަ ކުންފުނިތަކާއި އެހެން ޕްރޮޖެކްޓްތައް ވެސް ސަރުކާރުން މެންބަރުންގެ މަސްލަހަތު އޮތް ކުންފުނިތަކަށް ދީގެން ވަކި ބަޔަކަށް ބޮޑެތި މާލީ މަންފާތަކެއް ލިބޭ ގޮތަށް އަމަލުކޮށްފައިވާ ކަމަށް ތުހުމަތު ކުރެވެއެވެ.

އިންފްރާސްޓްރަކްޗަރު މިނިސްޓްރީ