ޗެމްޕިއަންސް ލީގުގައި ބޮޑު ތަފާތަކުން އާސެނަލް މޮޅުވި އިރު، ސިޓީގެ މެޗުވީ އެއްވަރު

ޔުއެފާ ޗެމްޕިއަންސް ލީގުގައި ރޭ ކުޅުނު މެޗުތަކުން އާސެނަލް ބޮޑު ތަފާތަކުން މޮޅުވި އިރު، މެންޗެސްޓާ ސިޓީގެ މެޗު ނިމުނީ އެއްވަރުވެގެންނެވެ.  

އާސެނަލުން ވަނީ ރަށުން ބޭރުގައި ސްޕޯޓިން ލިޒްބަން 5-1 އިން ބަލިކޮށްފައެވެ. އެހެންނަމަވެސް، މެންޗެސްޓަރ ސިޓީން ވަނީ އަމިއްލަ ދަނޑުގައި ތިން ގޯލުގެ ލީޑެއް ނަގާލައި، ފެޔަނޫޑާ 3-3 އިން އެއްވަރުވެފައެވެ.

އާސެނަލުން ރަށުން ބޭރުގައި ސްޕޯޓިން ލިޒްބަން އަތުން 5-1 އިން މޮޅުވި އިރު އެޓީމަށް ލަނޑުތައް ކާމިޔާބުކޮށްދީފައި ވަނީ ގަބްރިއެލް މާޓިނެލީ، ކައި ހަވާޓްޒް، ގަބްރިއެލް މަގާޅައެސް، ބުކާޔޯ ސަކާ އަދި ލެއަންޑްރޯ ޓްރޮސާޑް އެެވެ. ސްޕޯޓިންގެ ހަމައެކަނި ލަނޑު ޖެހީ ގޮންޒާލޯ އިނާޝިއޯ އެވެ.

އާސެނަލްގެ މޮޅާއެކު، އެ ޓީމުން ވަނީ ޗެމްޕިއަންސް ލީގުގައި ފަސް މެޗުން 10 ޕޮއިންޓް ހަމަކޮށް، ސްޕޯޓިންއާ އެއްވަރަށް ޕޮއިންޓް ހޯދި ނަމަވެސް އެ ޓީމަށް ވުރެ ކުރިއަށްޖެހިލާފައެވެ. މިހާރު އާސެނަލް އޮތީ ހަތްވަނާގައެވެ.

މެންޗެސްޓަރ ސިޓީއަށް މިވަނީ ވިދިވިދިގެން ކުޅުނު ހަވަނަ މެޗުންވެސް މޮޅެއް ހޯދޭގޮތް ނުވެފައެވެ. ރޭގެ މެޗުގައި ސިޓީންވަނީ  މެޗުގެ 75 ވަނަ މިނެޓާއި ހަމައަށް 3-0 އިން ލީޑުކޮށްފައެވެ. ނަމަވެސް މެޗުގެ ފަހު 15 މިނެޓުގެ ތެރޭގައި ފެޔަނޫޑާ ވަނީ ސިޓީ ކޮޅަށް ތިން ގޯލު ވައްދާލައި މެޗުގެ ނަތީޖާ ހަމަހަމަ ކޮށްފައެވެ. މިއީ ޗެމްޕިއަންސް ލީގުގެގުގެ ތާރީޚުގައި ވެސް އެހާ ކުޑަ ވަގުތެއްގެ ތެރޭގައި އެ ވަރުގެ ލީޑެއް ނަގާލެވުނު ފުރަތަމަ ފަހަރެވެ.

ސިޓީގެ ދަނޑުގައި ކުޅުނު މި މެޗުގައި އެ ޓީމަށް ލަނޑުތައް ޖަހައިދިނީ އާލިން ބްރައުޓް ހާލަންޑް ދެ ގޯލާއި އިލްކާއި ގުންޑޮގާން އެވެ. ފެޔަނޫޑްގެ ލަނޑުތައް ޖެހީ، އަނިސް ހަޖް މޫސާ، ސަންޓިއާގޯ ޖިމެނޭޒް އަދި ޑޭވިޑް ހަންކޯ އެެވެ.