ފްލެޓް ލިސްޓަށް ނުފޫޒު ފޯރުވާކަމުގެ ވާހަކަތައް ހައުސިން މިނިސްޓްރީން ދޮގުކޮށްފި

ފުލެޓް ލިބުން އެތަށްބައެއްގެ އިންތިޒާރާ ގުޅިފައިވާކަމެއް

ހުޅުމާލޭގެ ދެވަނަ ފިޔަވަހީގައި ތަރައްގީ ކުރަމުންދާ 4،000 ފްލެޓް ލިބޭ މީހުންގެ ލިސްޓަށް ސިޔާސީ ފަރާތްތަކުން ނުފޫޒު ފޯރުވަމުންދާ ކަމަށް ދެކެވޭ ވާހަކަތައް ހައުސިން މިނިސްޓްރީން ދޮގުކޮށްފިއެވެ.

މިނިސްޓްރީން ނެރުނު ނޫސް ބަޔާނެއްގައި ބުނެފައިވަނީ ފްލެޓް ލިސްޓުގެ ރީ-އިވެލުއޭޝަނުގެ މަސައްކަތަށް އެއްވެސް ފަރާތަކަށް ނުފޫޒު ނުފޯރުވޭނެކަމުގެ ފުރިހަމަ ޔަގީންކަން ރައްޔިތުންނަށް ދޭ ކަމަށެވެ.

މިދިޔަ ސަރުކާރުން އާންމުކުރި ލިސްޓާ ގުޅޭގޮތުން އެންޓި ކޮރަޕްޝަން ކޮމިޝަން (އޭސީސީ)އަށް ހުށަހެޅުނު މައްސަލަތަކަކާ ގުޅިގެން، ރައީސް މުހައްމަދު މުއިއްޒުގެ ހައުސިން އެޑްވައިޒަރީ ކޮމިޓީ އާއި މާލޭ ސިޓީ ކައުންސިލުން އެކުލަވާލާފައިވާ ހައުސިން ކޮންސަލްޓޭޓިވް ކޮމިޓީން ވަނީ، ފްލެޓަށް ލާފައިވާ ހުރިހާ ފޯމްތައް އަލުން އިވެލުއޭޓް ކުރަން ނިންމާފައެވެ.

ހައުސިން މިނިސްޓްރީގެ ބަޔާނުގައި ވަނީ މިނިސްޓްރީގެ މަގްސަދަކީ 'ގެދޮރުވެރިޔާ ސްކީމް'ގެ ދަށުން ފްލެޓް ލިބިގެންދަނީ އެންމެ ހައްގުވެރި މީހުންނަށް ކަމުގައި ކަނޑައެޅުން ކަމަށް ބަޔާންކޮށްފައެވެ. އަދި މިއީ ގިނަ އަދަދެއްގެ ރައްޔިތުންގެ ބޯހިޔާވަހިކަމުގެ އުންމީދުތަކާ ގުޅިފައިވާ ވަރަށް ހައްސާސް މައްސަލައެއް ކަމަށްވާތީ، މިކަމުގައި މިނިސްޓްރީގެ ރަސްމީ ބަހެއް ހޯދުމެއްނެތި، ސިޔާސީ ބޭނުމަށް ހަގީގަތާ ހިލާފު ހަބަރު ނުފެތުރުމަށް އެންމެހައި ފަރާތްތަކަށް އިލްތިމާސްކޮށްފައިވެއެވެ.

ހައުސިންގ މިނިސްޓްރީ