އޭސީސީ އަދި އީސީގެ އިސް މަޤާމުތަކަށް މީހުން އައްޔަންކުރުމާ ބެހޭ ބިލް ތަޞްދީޤުކޮށްފި

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު

އެންޓި-ކޮރަޕްޝަން ކޮމިޝަން (އޭސީސީ) އަދި އިލެކްޝަންސް ކޮމިޝަން (އީސީ)ގެ ރައީސާއި ނައިބު ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދޭ ޤާނޫނީ އިޞްލާޙު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، މިއަދު ތަޞްދީޤުކުރައްވައިފިއެވެ.

މި އިޞްލާޙުގެ ދަށުން، އޭސީސީ އަދި އީސީގެ ރައީސާއި ނައިބު ރައީސްގެ މަޤާމަށް މީހުން އައްޔަންކުރާނީ ރައީސުލްޖުމްހޫރިއްޔާއެވެ. ނަމަވެސް، މި އައްޔަންކުރުން ފާސްވާނީ ރައްޔިތުންގެ މަޖިލީހުގެ އަޣުލަބިއްޔަތުންނެވެ.

މި އިޞްލާޙުގެ ދަށުން، ކޮމިޝަންތަކުގެ ރައީސް ނުވަތަ ނައިބު ރައީސް އިސްތިޢުފާ ދޭން ބޭނުންވެއްޖެނަމަ، އިސްތިޢުފާގެ ސިޓީ ހުށަހަޅަންޖެހޭނީ ރައީސުލްޖުމްހޫރިއްޔާއަށެވެ. މިއީ ކުރިން އޮތް ގޮތާ ޚިލާފު ބަދަލެކެވެ.

މި ޤާނޫނަށް ޢަމަލުކުރަން ފެށުމުގެ ކުރިން ކޮމިޝަންތަކުގެ ރައީސާއި ނައިބު ރައީސްގެ މަޤާމަށް އައްޔަންކޮށްފައިވާ މެންބަރުން، ޤާނޫނުގައިވާ ގޮތުގެމަތިން މަޤާމުން ވަކިވަންދެން އެ މަޤާމުގައި ދެމިތިބޭނެއެވެ.

މި އިޞްލާޙު ގެނައުމުގެ ބިލަކީ 20 ވަނަ ރައްޔިތުންގެ މަޖިލީހުގެ 53 ވަނަ ޖަލްސާއިން ފާސްކުރެއްވި ބިލެކެވެ. މި ބިލު ތަޞްދީޤުކުރެއްވރެއްވުމާ ގުޅިގެން، މިހާރު ވަނީ ދިވެހިސަރުކާރުގެ ގެޒެޓުގައި ޝާއިޢުކުރައްވައިފައެވެ.

މި ޤާނޫނަށް ޢަމަލުކުރަން ފަށާނީ، މި ބިލު ތަޞްދީޤުކޮށް، ދިވެހިސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެންނެވެ. މި ބަދަލާއެކު، މިނިވަން މުއައްސަސާތަކުގެ އިސް މަޤާމުތަކަށް މީހުން އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބިގެންދާނެއެވެ.

ރައީސް ޑރ މުޙައްމަދު މުޢިއްޒު