ވެލާނާ އެއާޕޯޓުގެ އާ ޓާމިނަލް އަންނަ އަހަރު ޖުލައިގައި ހުޅުވޭނެ: އެމްއޭސީއެލް

ވެލާނާ އިންޓަނންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލްގެ މަސައްކަތުގެ 85 އިންސައްތަ މިހާރު ނިމިފައިވާ ކަމަށާއި އަންނަ އަހަރުގެ ޖުލައި މަހު ހުޅުވޭނެ ކަމަށް އެ އެއާޕޯޓު ހިންގާ ކުންފުނި، އެމްއޭސީއެލްއިން މިއަދު ބުނެފި އެވެ.

އެމްއޭސީއެލްއިން މިފަދައިން ބުނެފައި ވަނީ މިއަދު ބޭއްވުނު މަޖިލީހުގެ ސަރުކާރު ހިއްސާވާ ކުންފުނިތަކުގެ ކަންކަން ބަލަހައްޓާ އެސްއޯއީ ކޮމިޓީގެ ސަބްކޮމިޓީގެ ބައްދަލުވުމުގައެވެ. މި ބައްދަލުވުމުގައި ގައްދޫ ދާއިރާގެ ޕީއެންސީ މެންބަރު މުހައްމަދު އަލީ ކުރެއްވި ސުވާލަކަށް ޖަވާބު ދެއްވަމުން އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ވިދާޅުވީ، ޓާމިނަލްގެ މަސައްކަތް ވަރަށް ބާރަށް ޝެޑިއުލްއަށް ވުރެ ވެސް އަވަސްކޮށް ކުރިއަށްދާ ކަމަށެވެ.

ޝަރީފް ވިދާޅުވި ގޮތުގައި، ޓާމިނަލްގެ މަސައްކަތްތައް ރޭވިފައިވާ މިންވަރަށް ވުރެ 3 އިންސައްތަ އިތުރަށް ނިމިފައިވެއެވެ. މިގޮތުން، މިހާތަނަށް 85 އިންސައްތަ މަސައްކަތް ނިމިފައިވާއިރު، ރޭވިފައިވާ ގޮތުން 82 އިންސައްތަ ނިމިފައި ހުންނަންޖެހެނީއެވެ. މި ހިސާބުން، އަންނަ އަހަރުގެ ޖޫން ނުވަތަ ޖުލައި މަހު ޓާމިނަލް ހުޅުވޭނެ ކަމަށް އޭނާ ވިދާޅުވިއެވެ.

ކުރިން ސަރުކާރުން ވަނީ މި އަހަރުގެ ފަހުކޮޅު ޓާމިނަލްގެ ބައެއް ހުޅުވުމަށް ހަމަޖެހިފައިވާ ކަމަށް ބުނެފައެވެ. ނަމަވެސް، މިއީ ރާއްޖޭގެ ފަތުރުވެރިކަމުގެ މޫސުމުގެ އެންމެ ބިޒީ ދުވަސްވަރު ކަމަށްވާތީ، އެއާލައިންތައް ތަމްސީލުކުރާ އެއާލައިން އޮޕަރޭޓާސް ކޮމިޓީ (އޭއޯސީ)އިން ވަނީ އެކަމާ މެދު ކަންބޮޑުވުން ފާޅުކޮށްފައެވެ. އެހެންކަމުން، އެ ކޮމިޓީގެ ލަފާގެ މަތިން އަދި ރައީސުލްޖުމްހޫރިއްޔާގެ ހުއްދައާއެކު، ޓާމިނަލް ހުޅުވުން ވަނީ އަންނަ އަހަރަށް ފަސްކޮށްފައެވެ.