ދަރިންގެ ހަރަދަށް ދޭންޖެހޭ ފައިސާގެ އަދަދު 2000ރ. އަށްވުރެ ބޮޑުކޮށްދިނުމަށް ހުށަހަޅައިފި

ކައިވެނި ރޫޅުމަށް ފަހު، އެ ކައިވެންޏަށް ލިބިފައިވާ ދަރިންގެ ޚަރަދަށް ބައްޕަ ދޭންޖެހޭ 2000 ރުފިޔާއިން ޚަދަދުތައް ފޫނުބެއްދޭތީ މަޖިލީހުގެ ގަވާއިދު ކޮމިޓީ މެދުވެރިކޮށް ކަމާގުޅޭ އިދާރާތަކާ ބައްދަލުކޮށް ގަވާއިދު ބަދަލުކުރަން ގަލޮޅު އުތުރު ދާއިރާގެ މަޖިލިސް މެމްބަރު މުހައްމަދު އިބްރާހީމް އެދިވަޑައިގެންފިއެވެ.

އާއިލާއާ ބެހޭ ގާނޫނުގެ 72ވަނަ މާއްދާގައި ވާގޮތުން ކުއްޖާ ބެލެހެއްޓުމުގެ ޚަރަދަށް ކޮންމެ މަހަކު 2000 ރުފިޔާ ބައްޕަ ދޭންޖެހެއެވެ. އަދި އިތުރުވާ ކޮންމެ ކުއްޖަކަށް 1000 ރުފިޔާ ދ ދޭންޖެހެއެވެ. މީގެ އިތުރުން އަހަރަކު ތިން ހެދުން، ސްކޫލް ޔުނިފޯމާއި ފޮތްތައް އަދި ބޭސްފަރުވާގެ ޚަރަދުތައް ވެސް ބައްޕަ ކޮށްދޭންޖެހެއެވެ.

މެމްބަރު މުހައްމަދު އިބްރާހީމް ފޮނުއްވި ސިޓީގައި ވިދާޅުވެފައިވަނީ، ޚިދުމަތާއި ތަކެތީގެ އަގު އިންތިހާއަށް އުފުލިފައިވާއިރު، މަހެއްގެ މައްޗަށް ކަނޑައެޅިފައިވާ 2000 ރުފިޔާއަކީ ދަރިންގެ ހުރިހާ ޚަރަދެއް ފޫބެއްދޭވަރަށް ވުރެ މާކުޑަ އަދަދެއް ކަމަށެވެ. އޭނާ ވިދާޅުވީ ސްކޫލް ފީއާއި ޓިއުޝަން ފީތަކަށް އެކަނި ބަލައިލިކަމުގައި ވީނަމަވެސް، 2000 ރުފިޔާ އަކުން ނުފުއްދޭނެ ކަމަށެވެ.

ގަވާއިދުގައި ބަޔާންކޮށްފައިވާ މި އަދަދުގެ ސަބަބުން ކޯޓުގެ ދިގު މަރުހަލާ ކަނޑައްތު ކުރުމަށްފަހު ވެސް ލިބެނީ ހަމަ މިއަދަދު ކަމުން ރޫޅިފައިވާ އައިލާތަކާއި އެކަނިވެރި މައިންނަށް މިކަން ބަރުދާސްތު ކުރަން އުނދަގޫ ކަމަކަށް ވެފައި ވާކަން އެ ސިޓީގައި ފާހަގަކޮށްފައި ވެއެވެ.

އެހެންކަމުން މަޖިލީހުގެ ގަވާއިދު ކޮމިޓީ މެދުވެރިކޮށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުގެ ކަމާ ގުޅުންހުރި ބޭފުޅުންނާ ބައްދަލުކޮށް މި ގަވާއިދަށް ގެންނަން ޖެހޭ ހެޔޮ ބަދަލުތައް ގެނެވޭނެ ގޮތް ހަދައިދިނުމަށް އޭނާ ވަނީ އެދިވަޑައިގެންފައެވެ.