ރާއްޖޭގެ އިރުން ދެ ކޮޅިގަނޑު އުފެދިފައިވާތީ މޫސުން ގޯސްވާނެކަމަށް މެޓް އޮފީހުން ބުނެފި

އަންނަ ބުދަ ދުވަހުން ފެށިގެން ރާއްޖޭގެ މޫސުން ގޯސްވާނެ

ރާއްޖޭގެ އިރުން ދެ ކޮޅިގަނޑު އުފެދުމާ ގުޅިގެން، ބުދަ ދުވަހުން ފެށިގެން ކުރިއަށް އޮތް ފަސް ދުވަހަށް ވައިގަދަވެ މޫސުން ގޯސްވާނެ ކަމަށް މޫސުމާ ބެހޭ ޤައުމީ އިދާރާ (މެޓް އޮފީސް) އިން މިއަދު އިންޒާރު ދީފިއެވެ.

މެޓް އޮފީހުން ނެރުނު ބަޔާނުގައި ބުނެފައިވާ ގޮތުން، އެއް ކޮޅިގަނޑު އުފެދިފައިވަނީ ބޭ އޮފް ބެންގާލްގައެވެ. މި ކޮޅިގަނޑު ދަނީ ހުޅަނގު އުތުރަށް އިންޑިއާގެ ޓެމިލްނާޑޫ އާއި ސްރީ ލަންކާގެ އައްސޭރިފަށާ ދިމާއަށް ދަތުރުކުރަމުންނެވެ. އަނެއް ކޮޅިގަނޑު އުފެދިފައިވަނީ ރާއްޖެއާ ދުރުން، އިރުދެކުނުންނެވެ.

މި ދެ ކޮޅިގަނޑުގެ ސަބަބުން ބުދަ ދުވަހުން ފެށިގެން ކުރިއަށް އޮތް ފަސް ދުވަހު ވައި ގަދަވެ، ކަނޑުތައް ގަދަވާނެ ކަމަށް މެޓް އޮފީހުން ލަފާކޮށްފައިވެއެވެ. ރާއްޖޭގެ ދެކުނުގެ އަތޮޅުތަކަށް ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، އުތުރާއި މެދުރާއްޖޭގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ވެސް މެޓް އޮފީހުން ބުނެފައިވެއެވެ.

މި މޫސުމުގައި ކަނޑު ދަތުރުފަތުރު ކުރާއިރު ސަމާލުވުމަށް މެޓް އޮފީހުން އާންމުންނަށް އިލްތިމާސްކޮށްފައިވެއެވެ.

މޫސުން