ތިނަދޫގެ ސިޓީ ދަރަޖައާމެދު ސުވާލު އުފެއްދި ޑެޕިއުޓީ މިނިސްޓަރު މަޤާމުން ވަކިކޮށްފި

ގދ. ތިނަދޫއަށް ސިޓީގެ ދަރަޖަ ދިނުމާމެދު ސުވާލު އުފައްދައި ހައިކޯޓަށް މައްސަލަ ހުށަހެޅުމާ ގުޅިގެން، އެންވަޔަރަމަންޓް މިނިސްޓްރީގެ ޑެޕިއުޓީ މިނިސްޓަރު އަދި ޤާނޫނީ ވަކީލު މުޙައްމަދު ރާގިބު އަޙްމަދު މިއަދު އެ މަޤާމުން ރައީސް މުޙައްމަދު މުޢިއްޒުދު މުޢިއްޒު ވަކިކުރައްވައިފިއެވެ.

ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެން، ރާގިބު މަޤާމުން ވަކިކުރެއްވި ކަމަށެވެ.

ރާގިބު ހައިކޯޓަށް ހުށަހެޅުއްވި މައްސަލައިގައި ބުނެފައިވަނީ، ތިނަދޫގައި 10،000 މީހުން ހަމަވާ ކަމަށް ދައްކާފައިވަނީ ޞައްޙަ ނޫން ލިޔެކިޔުންތަކުގެ މައްޗަށް ކަމަށެވެ. އޭގެ ތެރޭގައި މަރުވެފައިވާ 115 މީހަކު ކައުންސިލްގެ ދަފްތަރުގައި ހިމަނާފައިވާ ކަމަށާއި، ތަކުރާރުވާ އައިޑީ ކާޑުތައް ގިނަ ކަމަށް ފާހަގަކޮށްފައިވެއެވެ.

ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު)ގެ މަޢުލޫމާތުން ދައްކާގޮތުގައި މި މަހުގެ 17 ގެ ނިޔަލަށް ވެސް ތިނަދޫގެ އާބާދީއަކީ 7،924 ކަމަށް ރާގިބު ފާހަގަކުރައްވާފައިވެއެވެ.

ރާގިބުގެ މި މައްސަލަ ބަލައިގަތުމާ މެދު ހައިކޯޓުން އަދި ވަކި ގޮތެއް ނިންމާފައިނުވާ ކަމަށް އެ ކޯޓުގެ ރަޖިސްޓްރީން ދައްކައެވެ. ތިނަދޫއަށް ސިޓީއެއްގެ ދަރަޖަ ދިނީ 31 އޮގަސްޓް 2023 ގައި ކުރީގެ ރައީސް އިބްރާހިމް މުޙައްމަދު ޞާލިޙްއެވެ.