އިސްރާއީލުގެ ހަމަލާތަކުން ދެ ދުވަސް ތެރޭ ޣައްޒާއިން 120 މީހުން ޝަހީދުކޮށްލައިފި

އިސްރާއީލުން ޣައްޒާއަށް ދިން ހަމަލާތަކުގައި ދެ ދުވަހުގެ ތެރޭގައި 120 މީހުން ޝަހީދުވެފައިވާ ކަމަށް ފަލަސްތީނުގެ ސިއްހީ އޮފިޝަލުން ބުނެފިއެވެ.

ޣައްޒާ ސިޓީގެ ޒައިތޫން ސަރަހައްދުގައި ހުރި މީހުން ދިރިއުޅޭ އިމާރާތަކަށް ދިން ހަމަލާއެއްގައި ހަތް މީހަކު ޝަހީދުފައިވާއިރު، ޣައްޒާގެ މެދުތެރެއާއި ދެކުނުންވެސް މީހުން ޝަހީދުވެފައިވާ ކަމަށް އޮފިޝަލުން ބުނެއެވެ.

އިސްރާއީލުން ދިން ވައިގެ ހަމަލާތަކުގައި ޣައްޒާގެ މެދުތެރޭގެ ނޫސެއިރަތު ރެފިއުޖީ ކޭމްޕްގައި ހުންނަ އަލްފާރޫގު މިސްކިތަށް ބޮޑެތި ގެއްލުންތަކެއް ލިބިފައިވާ ކަމަށް އަލްޖަޒީރާއިން ރިޕޯޓުކޮށްފައިވެއެވެ. ޣައްޒާގެ އުތުރަށް ދޭ ހަމަލާތައް ވަރުގަދަކޮށްފައިވާއިރު، އެ ސަރަހައްދުގައި ޚިދުމަތް ދެވެން ހުރި އެންމެ ފަހު ހޮސްޕިޓަލަށްވެސް ހަމަލާދީ ބައެއް މުވައްޒަފުން ވަނީ ޒަޚަމްކޮށްލާފައެވެ.

ހުކުރު ދުވަހު ޣައްޒާގެ ސިއްޚީ ވުޒާރާއިން ބުނެފައިވަނީ ހޮސްޕިޓަލްތަކަށް ތެޔޮ ބޭނުންވާ ކަމަށާއި ތެޔޮ ނުލިބިއްޖެނަމަ، ދެ ދުވަހުގެ ތެރޭގައި ޚިދުމަތް ދިނުން ހުއްޓާލަން ޖެހޭނެ ކަމަށެވެ. އިސްރާއީލުން ޣައްޒާގެ އުތުރަށް އެއްގަމު މަގުން ދޭ ހަމަލާތައް ވަރުގަދަ ކުރި ފަހުން އެ ސަރަހައްދަށް އެގޮތަކަށްވެސް އިންސާނީ އެހީ ފޯރުކޮށްދެވިފައިނުވާ ކަމަށް އދން މި ހަފުތާ ކުރީކޮޅު ބުނެފައިވެއެވެ.

މިދިޔަ އަހަރު އޮކްޓޫބަރު ހަތް ވަނަ ދުވަހުން ފެށިގެން އިސްރާއީލުން ޣައްޒާއަށް ދިން ހަމަލާތަކުގައި މިހާތަނަށް 44،000 އަށް ވުރެ ގިނަ މީހުން ވަނީ ޝަހީދުކޮށްލާފައެވެ. ހަމަލާތަކުގައި ޒަޚަމްކޮށްލާފައިވާ މީހުންގެ އަދަދު 104،000 އަށް ވުރެ ގިނަ ކަމަށް ފަލަސްތީނުގެ ސިއްހީ އޮފިޝަލުން ބުނެއެވެ.

އެއްވެސް ޝަރުތަކާނުލައި ދާއިމީކޮށް ހަނގުރާމަ ހުއްޓާލުމަށް ގޮވައިލައި އެންމެ ފަހުން މިދިޔަ ބުރާސްފަތި ދުވަހު އދ ގެ ސަލާމަތީ މަޖިލީހަށް ހުށަހެޅި ގަރާރުވެސް އެމެރިކާއިން ވަނީ ބޭރުކޮށްލާފައެވެ. އެމެރިކާއަކީ އިސްރާއީލަށް މާލީ އަދި އަސްކަރީ ގޮތުންވެސް ވާގިވެރިވާ އިސްރާއީލުގެ އެންމެ ގާތް ގައުމެވެ.