ދޮޅު ކިލޯއަށް ވުރެ ގިނަ "ޕާޓީ ޑްރަގްސް" އެތެރެކުރަނިކޮށް އަނެއްކާވެސް އަތުލައިގެންފި

ރާއްޖެއަށް ކަނޑުމަގުން އެތެރެކުރަން އުޅުނު ބަރުދަނުގައި 1.518 ކިލޯ ހުރި މަސްތުވާތަކެތި ކަސްޓަމްސުން އަތުލައިގަނެފިއެވެ.

ކަސްޓަމްސުން ބުނީ މި ތަކެތި އެތެރެ ކުރަނިކޮށް އަތުލައިގަތީ މާލެ ކޮމާޝަލް ހާބަރަށް ގެނެސްފައިވާ ސީފްރައިޓް ޝިޕްމަންޓެއް ބަލައި ފާސް ކުރުމުގެ ތެރޭގައި ޝައްކު ކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލައި ފާސްކުރުމުގެ ތެރޭގައި ކަމަށެވެ.

ބަލައި ފާސް ކުރެވުނު ޝިޕްމަންޓުގައި ހިމެނޭ މުދަލުގެ ތެރޭގައި ފޮރުވާފައި ހުރި، މަސްތުވާތަކެތި ކަމަށް ޝައްކު ކުރެވޭ ތަކެތި އަޅާފައި ހުރި ޕެކެޓު ތަކެއް އަތުލައި ގަނެފައިވާ ކަމަށާއި، މި ތަކެތި ތަހުލީލު ކުރިއިރު މަސްތުވާތަކެތީގެ ބާވަތެއް ކަމަށްވާ "މެތަމްފެޓަމިން" އަށް ޕޮޒިޓިވް ވެފައިވާ ކަމަށް ކަސްޓަމްސުން ބުންޏެވެ.

މިތަކެތީގެ މަގުމަތީ އަގު ބެލެވޭ ގޮތުގައި 3،000،000.00 (ތިން މިލިއަން) ދިވެހި ރުފިޔާ އަށްވުރެ މަތިވާނެ ކަމަށް ކަސްޓަމްސުން ބުނެެއެވެ.

މި ޝިޕްމެންޓުގެ އިތުރުން ރާއްޖޭގެ ކަނޑުގެ ސަރަހައްދަށް ގަވާއިދާ ހިލާފަށް ވަދެ އުޅެނިކޮޮށް ދިވެހި ސިފައިން ހިފެހެއްޓި، ސްރީލަންކާގެ މަސްބޯޓުން ވެސް 468.6 ކިލޯގެ މަސްތުވާތަކެތި ފެނިފައިވާކަމަށް ފުލުހުން މިއަދު ބުނެފައިވެއެވެ.

އެމްއެންޑީއެފް ކޯސްޓްގާޑުން މިއަދު ހިންގި އޮޕަރޭޝަނެއްގައި މި ބޯޓު އަތުލައިގަތީ ހދ. މަކުނުދޫ ބޭރުންނެވެ.

ފުލުހުން ބުނީ އެ ބޯޓުގައި ހުރި މަސްތުވާތަކެތީގެ ޕްރެލިމިނަރީ ޓެސްޓުގެ ނަތީޖާ ދައްކާ ގޮތުން 124.6 ކިލޯ އަކީ ކޮކެއިން، އަދި 344 ކިލޯ އަކީ މެތު ކަމަށެވެ.

މި ތަކެތީގެ މަގުމަތީ އަގު އެއް ބިލިއަން ރުފިޔާއަށް އަރާ ކަމަށް ފުލުހުން ހާމަކޮށްފައި ވެއެވެ.