ރާއްޖޭ ސަރަހައްދުން އަތުލައިގަތް ލަންކާ ބޯޓަކުން އެއް ބިލިއަން ރުފިޔާގެ ޕާޓީ ޑްރަގްސް

ރާއްޖޭގެ ކަނޑުގެ ސަރަހައްދަށް ގަވާއިދާ ހިލާފަށް ވަދެ އުޅެނިކޮޮށް ދިވެހި ސިފައިން ހިފެހެއްޓި، ސްރީލަންކާގެ މަސްބޯޓުން 468.6 ކިލޯގެ މަސްތުވާތަކެތި ފެނިފައިވާކަމަށް ފުލުހުން މިއަދު ބުނެފިއެވެ.

އެމްއެންޑީއެފް ކޯސްޓްގާޑުން މިއަދު ހިންގި އޮޕަރޭޝަނެއްގައި މި ބޯޓު އަތުލައިގަތީ ހދ. މަކުނުދޫ ބޭރުންނެވެ. އެވަގުތު ބޯޓުގައި ތިބީ ފަސް މީހުންނެވެ.

އެ ފަސް މީހުންނަކީވެސް އަވަށްޓެރި ލަންކާގެ މީހުންނެވެ.

މިހާރު ކުރިއަށްދާ ފުލުހުންގެ ނޫސްވެރިންގެ ބައްދަލުުވުމުގައި ކޮމިޝަނާ އޮފް ޕޮލިސް އަލި ޝުޖާއު ވިދާޅުވީ ސިފައިންނާ އެކު ކުޅުދުއްފުށީ ސިޓީ ޕޮލިހުން މިއަދު ހެނދުނު އެ ބޯޓަށް އަރައި ފާސް ކުރުމުން ޖުމުލަ 468.6 ކިލޯގެ މަސްތުވާތަކެެތި ކަމަށް ޝައްކު ކުރެވޭ އެއްޗެހި ފެނިފައިވާ ކަމަށެވެ.

ސީޕީ ވިދާޅުވީ އެ ބޯޓުގައި ހުރި މަސްތުވާތަކެތީގެ ޕްރެލިމިނަރީ ޓެސްޓުގެ ނަތީޖާ ދައްކާ ގޮތުން 124.6 ކިލޯ އަކީ ކޮކެއިން، އަދި 344 ކިލޯ އަކީ މެތު ކަމަށެވެ.

"މި އުޅަނދު ބަލައި ފާސް ކުރުމުން ޖުމުލަ 468.6 ކިލޯގެ މަސްތުވާތަކެތި ކަމަށް ޝައްކު ކުރެވޭ އެއްޗެހި ވަނީ ފެނިފަ. މި ތަކެތީގެ ޕްރެލިމިނަރީ ޓެސްޓުގެ ނަތީޖާ ދައްކާ ގޮތުން މީގެ ތެރޭގައި 344 ކިލޯގެ މެތް، އަދި 124.6 ކިލޯގެ ކޮކެއިން ފެނިފައިވޭ،" ސީޕީ ވިދާޅުއެވެ.

މި ތަކެތީގެ މަގުމަތީ އަގު އެއް ބިލިއަން ރުފިޔާއަށް އަރާ ކަމަށް ވެސް ޝުޖާއު ވިދާޅުވިއެވެ.

ސުޖާއު ވިދާޅުވީ ތަހުގީގު ކުރިއަށް ދާތީ، ލަންކާގެ މަސް ބޯޓާއި ރާއްޖޭގެ އެއްވެސް މަސްތުވާ ތަކެތީގެ ނެޓްވޯކަކާ ގުޅުމެއްވާ ކަން އަދި ދެނެގަނެވިފައި ނުވާ ކަމަށެވެ.