އައު އަހަރު އިސްކަން ދޭނީ ހުރިހާ އުމުރުފުރައެއް ހިމެނޭ ގޮތަށް، ނަމާދަށް ލޯބިޖެއްސުން: ޑރ. ޝަހީމް

އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސައީދު --

މިނިސްޓްރީގެ ދީނީ ހޭލުންތެރިކަން އިތުރު ކުރުމުގެ ޕްލޭންގައި އައު އަހަރު އެންމެ ބޮޑު އިސްކަމެއް ދޭނީ ނަމާދު ކުރަން އަހުލުވެރި ކުރުވުމަށް ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

ޝަހީމް, މީޑިއާތަކާ ހިއްސާކުރެއްވި މެސެޖެއްގައި ވިދާޅުވީ ދީނީ ހޭލުންތެރިކަން އިތުރު ކުރުމުގެ ޕްލޭންގައި އަންނަ އަހަރު އެންމެ ބޮޑު އިސްކަމެއް ދޭނީ ހުރިހާ ސަރަހައްދެއްގައި ވެސް ހުރިހާ އުމުރުފުރައަށް އަމާޒުކޮށް ނަމާދު ކުރަން އަހުލުވެރި ކުރުވުމަށާއި، ނަމާދަށް ލޯބިޖެއްސުމަށް ކަމަށެވެ.

މިއަދުގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒަކީ ވެސް ޖަމާއަތުގައި ފަރުޟު ފަސް ނަމާދު ކުރުމަށް ވަރަށް ބޮޑަށް ލޯބި ކުރައްވައި އަދި އެންމެންވެސް އެކަން އަދާ ކުރުމަށް ހިތްވަރު ދެއްވާ ބޭފުޅެއްކަން ފާހަގަ ކުރެވެއެވެ.

މީގެ ކުރިން ރައީސް ވިދާޅުވެފައި ވަނީ އެ މަނިކުފާނުގެ ސަރުކާރުން ބޭނުންވަނީ ގާނޫނު ނަގަހައްޓައި، އިސްލާމްދީނަށް ނަސްރުދޭން ކަމަށެވެ.

އެގޮތުން ފަރުޟު ފަސް ނަމާދަކީ އިސްލާމްދީނުގެ މުހިންމު އެއް ތަނބަށްވާއިރު، އެ މަނިކުފާނު ވަނީ ފަރުޟު ފަސް ނަމާދު އޭގެ ވަގުތުގައި ގާއިމު ކުރަން އިލްތިމާސް ކުރައްވާފައެވެ.

ވަކިން ހާއްސަކޮށް އެ މަނިކުފާނު ވަނީ ފަތިސް ނަމާދުގެ ޖަމާއަތް ހީނަރުވިޔަ ނުދިނުމަށް އެދިވަޑައިގެންފައެވެ.

ރައީސް އޭރު ވިދާޅުވީ ނަމާދުގެ ޖަމާއަތް ބައިބޯ ވެއްޖެ ނަމަ، މުޅި ގައުމު ވަރުގަދަވެ، އުފާވެރިވެ، ބާއްޖަވެރިވާނެ ކަމަށެވެ.

ރައީސް ޑރ މުޙައްމަދު މުޢިއްޒު ނަމާދު