އޭސީސީ އާއި އީސީގެ ފަސް މެންބަރަކު ވަކިކުރުމަށް ކޮމިޓީން ނިންމައިފި

އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ)ގެ ފަސް މެންބަރުން ވަކިކުރުމަށް މިނިވަން މުއައްސަސާތަކުގެ ކޮމިޓީން މިއަދު ބޭއްވި ސިއްރު ބައްދަލުވުމުގައި ނިންމައިފިއެވެ.

ކޮމިޓީގެ ބައްދަލުވުމުގައި މަޤާމުން ވަކިކުރަން ފާސްކޮށްފައިވަނީ އޭސީސީގެ ނައިބު ރައީސް ޢަބްދުއްސަލާމް އާއި މެންބަރު ތޯހާ މުޙައްމަދު، އަދި އިލެކްޝަންސް ކޮމ ކޮމިޝަނުގެ ނައިބު ރައީސް ޢަލީ ނަޝާތާއި މެންބަރުން ޑރ. މުޙައްމަދު ޒާހިރު އަދި މުޙައްމަދު އާޞިފްއެވެ.

މި ނިންމުން ނިންމާފައިވަނީ އެ ދެ މުއައްސަސާގެ ޤާނޫނުތަކުގައިވާ މާއްދާތަކަށް ރިޢާޔަތްކޮށެވެ. އޭގެ ތެރޭގައި ކޮމިޝަންގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެން ނުވާނެ ކަމަށާއި، އަމިއްލަ މަޞްލަޙަތު ހާސިލުކޮށްގެން ނުވާނެ ކަމަށް ބަޔާންކޮށްފައިވާ މާއްދާތައް ހިމެނެއެވެ.

ސިވިލް ސަރވިސް ކޮމިޝަން (ސީއެސްސީ)ގެ ރައީސް މުޙައްމަދު ނާޞިޙުގެ މައްސަލަ ވެސް ދިރާސާކޮށްފައިވީ ނަމަވެސް، އޭނާ ވަކިނުކުރުމަށް ކޮމިޓީން ނިންމިއެވެ. މި ބައްދަލުވުން ކުރިއަށް އަށް ގެންގޮސްފައިވަނީ ސިއްރު ބައްދަލުވުމެއްގެ ގޮތުގައެވެ.

ކޮމިޓީން މިގޮތަށް ނިންމާފައިވަނީ އޭސީސީ އާއި އިލެކްޝަންސް ކޮމިޝަނުގެ ރައީސް އާއި ނައިބު ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް އެ ކޮމިޝަންތަކާ ގުޅޭ ޤާނޫނަށް އިޞްލާޙެއް ހުށަހަޅާފައިވަނިކޮށެވެ. މާދަމާގެ މަޖިލިސް ޖަލްސާގައި މި މައްސަލައަށް ވޯޓަށް އަހާނެ ކަމަށް ބެލެވެއެވެ.