މާލޭ ގެއަކަށް މީހަކު ވައްދައި ފޭރުނު މައްސަލައިގައި ހައްޔަރު ކުރި ތިން މީހުން ޖަލަށް ލާން ހުކުމް ކޮށްފި

ފޭރުނު މައްސަލައިގައި ޖަލަށް ލާން ހުކުމްކޮށްފައިވާ ތިން މީހުން -- ފޮޓޯ/ ފުލުހުން

މާލޭ ގެއަކަށް މީހަކު ވައްދައި، ފޭރުނު މައްސަލައިގައި ހައްޔަރު ކުރި ތިން މީހުން، އެއް އަހަރާއި ތިން މަހަށް ޖަލަށް ލާން ކުރިމިނަލް ކޯޓުން ހުކުމް ކޮށްފިއެވެ.

މިއީ މިދިޔަ ޖުލައި މަހުގެ 24 ވަނަ ދުވަހުގެ ވަގުތެއްގައި، މއ. މަސްފަން ގެއަށް ދިވެހި ފިރިހެނަކު ވައްދައި، އެމީހާއަށް ވަޅިން ބިރުދައްކައި އޮރިޔާންކޮށް، އަނިޔާކޮށް، އޭނާގެ މޯބައިލް ފޯނު އަތުލައި އޭނާގެ ބެންކު އެކައުންޓުން ފައިސާ ޓްރާންސްފާ ކުރުވައި އަދި އޭނާގެ ކޭޝްކާޑު ބޭނުން ކޮށްގެން އޭޓީއެމް އިން ފައިސާ ނަގާފައިވާ މައްސަލައެވެ.

މި މައްސަލައިގައި ހައްޔަރުކޮށްފައި ވަނީ މއ. މަސްފަން، އުމުރުން 43 އަހަރުގެ އާއިޝަތު، އާއި މއ. މަސްފަން، އުމުރުން 27 އަހަރުގެ މުޙައްމަދު ރީހާން، އަދި ސ. ހިތަދޫ / ސޯމާ، އުމުރުން 35 އަހަރުގެ ޝަފީގު އިބްރާހީމްއެވެ.

ފުލުހުން ބުނި ގޮތުގައި އެ ފިރިހެން މީހާއަށް ބިރު ދައްކައިގެން އޭނާގެ އެކައުންޓުން އެހެން އެކައުންޓަކަށް 20،000 ރުފިޔާ ފޮނުވާފައި ވެއެވެ. އަދި އޭނާގެ ކާޑު ބޭނުން ކޮށްގެން އޭޓީއެމުން 25،000 ރުފިޔާ ނަގާފައި ވެއެވެ.

މި ތިން މީހުންގެ މައްޗަށް ދައުވާ ކޮށްދިނުމަށް އެދި ފުލުހުން ޕީޖީ އޮފީހަށް ފޮނުވީ މި މަހުގެ ނުވަ ވަނަ ދުވަހުއެވެ.

ފުލުހުން ކްރިމިނަލް ކޯޓު