ޕީއެންސީ އެތެރޭގެ އިންތިހާބުގެ ވަގުތީ ނަތީޖާ އިއުލާން ކުރުން މިރޭ

ސަރުކާރު ހިންގައި ޕާޓީ، ޕީއެންސީގެ އެތެރޭގެ އިންތިހާބުގެ ވަގުތީ ނަތީޖާ މިރޭ އިއުލާން ކުރާނެ ކަމަށް އެޕާޓީން ބުނެފިއެވެ.

ހޮނިހިރު ދުވަހު ހެނދުނު 10:00 އިން މެންދުރު ފަހު 2:00 އާ ހަމައަށް ކުރިޔަށްދިޔަ އިންތިހާބުގެ ވޯޓުލުން މާލެއާ އެކު 90 ރަށެއްގައި ކުރިއަށް ގެންދިޔައެވެ.

އިންތިހާބުގައި 143 ވޯޓު ފޮށި ބަހައްޓާފައި ވާއިރު އޭގެ ތެރެއިން 53 ފޮށި ހުރީ މާލޭގައެވެ. އަދި މާލެއާ އެކު 90 ރަށެއްގައި ވޯޓުލުން ކުރިއަށް ގެންދިޔައެވެ.

އިއްޔެ ބޭއްވި އިންތިހާބުގައި 1،984 މަގާމަކަށް މީހުން އިންތިހާބުކުރި ނަމަވެސް އިންތިހާބަކާ ނުލައި ބައެއް މަގާމުތަކަށް މީހުން ހޮވިފައިވާތީ، ކެންޑިޑޭޓުންގެ އަދަދަކީ 667 އެވެ.

އިންހާބާ ގުޅޭގޮތުން އެ ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ ނަތީޖާ އިއުލާން ކުރުމުގެ މަސައްކަތް އިންތިހާބީ ކޮމެޓީން ކުރަމުން އަންނަ ކަމަށާއި އެހެންވެ، މިރޭގެ ވަގުތެއްގައި އިންތިހާބުގެ ވަގުތީ ޖަތީޖާ އިއުލާން ކުރެވޭވަރު ވާނެ ކަމަށެވެ.

"އަޅުގަނޑު މި ބަލަނީ އިރާދަ ކުރެއްވިއްޔާ މިރޭގެ ވަގުތެއްގައި އިންތިހާބުގެ ވަގުތީ އިއުލާން ކުރެވޭނެ ކަމަށް. އެއަށްފަހު ދާއިމީ ނަތީޖާ އިއުލާން ކުރާނެ ދުވަހެއް އަޅުގަނޑުމެން ދަންނަވާނަން،" އަދުރޭ ވިދާޅުވިއެވެ.

ޕީއެންސީގެ ދަފްތަރުގައިވާ ގޮތުން އެ ޕާޓީގައި މިވަގުތު ތިބީ 62،000 މީހުންނެވެ. ނަމަވެސް ދާއިރާތަކުގެ އިންތިހާބުގައި ވޯޓުލުމުގެ ހައްގު ލިބުނީ 34،904 މީހަކަށެވެ.

ރާއްޖޭގެ ސިޔާސީ ޕާޓީއަކުން ބޭއްވި އެންމެ ބޮޑު އެއް އިންތިހާބުގައި ޕާޓީގެ އިސް މަގާމުތަކާއި ދާއިރާތަކުގެ ރައީސުންނާއި ނައިބު ރައީސުންނާއި ޕާޓީން ރަށްރަށުގައި ހިންގައި ހަރަކާތްތަކުގެ އެކި މަގާމުތަކަށް މީހުން އިންތިހާބުކުރިއެވެ.