ރަޝިއާއިން ހުޅަނގަށް އިންޒާރުދީ، އައު ހައިޕާސޮނިކް މިސައިލް ތަޖުރިބާކޮށްފި

ރަޝިއާއިން ޔުކްރެއިން އާ ދެކޮޅަށް "އޮރެޝްނިކް" މަރުކާގެ ހައިޕާސޮނިކް އައު މިސައިލެއް ތަޖުރިބާ ކުރުމަށްފަހު، ރަޝިއާގެ ރައީސް ވްލަދިމިޔާ ޕޫޓިން ހުޅަނގަށް ވަރުގަދަ އިންޒާރެއް ދީފިއެވެ.  

މި މިސައިލް ތަޖުރިބާކުރީ ޔުކްރެއިނުން ރަޝިއާއަށް "އަޓަކަމްސް" މަރުކާގެ ދުރުރާސްތާގެ މިސައިލް ބޭނުންކޮށްގެން ހަމަލާދިނުމުން އޭގެ ރައްދުގެ ގޮތުގައެވެ. ރަޝިއާގެ މި އައު މިސައިލް އަމާޒުކުރީ ޔުކްރެއިންގެ ސިނާއީ އަދި އަސްކަރީ ކާރުޚާނާތަކެއް ހުންނަ ބޮޑު އެކުވެންޏަކަށެވެ.

ޕޫޓިން ވިދާޅުވިގޮތުގައި "އޮރެޝްނިކް" މަރުކާގެ ހައިޕާސޮނިކް މިސައިލް ވައްޓާލެވޭނެ އެއްވެސް ދިފާއީ ޓެކްނޮލޮޖީ ދުނިޔޭގެ އެއްވެސް ގައުމެއްގައި ނުހުންނާނެ ކަމަށާއި އަދި އެ މިސައިލަށް ހުރަސް އެޅޭފަދަ ދިފާއީ ނިޒާމެއް މިހާތަނަށް އެއްވެސް ގައުމަކަށް އުފެއްދިފައިނުވާ ކަމަށެވެ.

ރަޝިއާގެ އަސްކަރީ މަސްއޫލުވެރިއެއްގެ ބަހުން، މި ބާވަތުގެ މިސައިލުން އެމެރިކާގެ ކޮންމެ ތަނަކަށް ހަމަލާދިން ނަމަވެސް އެހަމަލާއެއް އެމެރިކާއަށް އެއްވެސް ވަރަކަށް ދިފާއު ނުކުރެވޭނެއެވެ. އަދި މި މަރުކާގެ ކޮންމެ މިސައިލެއް ވެސް ހުރަހަކާ ނުލައި އެމެރިކާގެ ކޮންމެ ތަނަކަށްވެސް އަރާނެއެވެ.

ޕޫޓިން އިތުރަށް ވިދާޅުވިގޮތުގައި ރަޝިއާގެ އަސްކަރީ އިންޑަސްޓްރީން މިހާރު ގެންދަނީ އައުބާވަތުގެ ވަރަށް ޒަމާނީ ހަތިޔާރުތަކެއް އުފައްދަމުންނެވެ. އަދި އަލަށް އުފައްދާ ހަތިޔާރުތައް ދެން ތަޖުރިބާކުރާނީ ޔުކްރެއިންގެ ތަންތަނަށް ހަމަލާދީގެން ކަމަށްވެސް އޭނާ ވިދާޅުވިއެވެ.

ރަޝިޔާގެ މި ވާހަކަތަކުން ދޭހަވަނީ އެ ޤައުމިން މިހާރު ތައްޔާރުކުރަމުންދާ އައު ހަތިޔާރުތަކުގެ ނުރައްކާތެރިކަމާއި، ހުޅަނގުގެ ފަރާތުން ކުރިމަތިވާ ބިރުވެރިކަމަށް ރަޝިއާއިން ދޭ އިންޒާރެވެ. މިކަމުން ދެ ފަރާތުގެ ދެމެދުގައި އޮތް ހަނގުރާމައިގެ ޙާލަތު އިތުރަށް ގޯސްވެދާނެކަމުގެ ބިރު އުފެދެއެވެ.