މިދިޔަ 19 އަހަރު ތެރޭ ފުރަތަަމަ ފަހަރަށް ސިޓީ ޖެހިޖެހިގެން ފަސް މެޗުން ބަލިވެއްޖެ

މެންޗެސްޓާ ސިޓީ އަމިއްލަ ދަނޑުގައި ޓޮޓެންހަމް ހޮޓްސްޕާސް އަތުން 4-0 އިން ބަލިވެ، ވޭތުވެ ދިޔަ ފަސް އަހަރުތެރޭ ފުރަތަމަ ފަހަރަށް ޖެހިޖެހިގެން ފަސްމެޗުން ބަލިވެގެން މެޗު ނިންމާލަން ޖެހިއްޖެއެވެ.

މިއީ ސިޓީގެ ކާމިޔާބު ކޯޗް، ގާޑިއޯލާގެ ކޯޗިން ކެރިއަރުގައި ވެސް ޖެހިޖެހިގެން ފަސް މެޗުން ބަލިވި ފުރަތަމަ ފަހަރެވެ.

ރޭގެ މެޗުގައި ޓޮޓެންހަމް އަށް ފުރަތަމަ ހާފުގައި ގާތްގާތުގައި ދެ ގޯލު ޖަހައި، ދެ ގޯލުގެ ލީޑެއްނަގައިިދިނީ މިއަދު 28 ވަނަ އުފަންދުވަސް ފާހަގަކުރި ޖޭމްސް މެޑިސަން އެވެ. ފުރަތަމަ ލަނޑު ޖެހީ ޑޭޖާން ކުލުސެވްސްކީ ދިން ބޯޅައަކުންނެވެ. ދެ ވަނަ ލަނޑު ޖަހަން ފުރުސަތު ހޯދައިދިނީ ސޮން ހެއުން މިން އެވެ. ދެ ވަނަ ހާފުގައި ޓޮޓެންހަމްގެ ތިން ވަނަ ލަނޑު ޖެހީ، ކައުންޓަ އެޓޭކެއްގައި އަރައި، ފުލްބެކް، ޕެޑްރޯ ޕޯރޯ އެވެ. އަދި އެޓީމުގެ ފަހު ލަނޑު ޖެހީ ބްރެނަން ޖޯންސަން އެވެ.

އިނގިރޭސި ޕްރިމިއާ ލީގުގައި ރޭ ކުޅެވުނު އިތުރު މެޗުތަކަށް ބަލާއިރު  އާސެނަލާއި ޗެލްސީ ވަނީ އެ ޓީމުތަކުގެ މެޗުތަކުން މޮޅުވެ، ލީގު ތާވަލުގައި ކުރިއަށް ޖެހިލައިފައެވެ.  ޗެލްސީން ވަނީ ލެސްޓާ ސިޓީ ދަނޑުގައި 2-1 އިން މޮޅުވެފައެވެ. އަދި އާސެނަލުން ވަނީ އަމިއްލަ ދަނޑުގައި 3-0 އިން ނޮޓިންހަމް ފޮރެސްޓް ބަލިކޮށްފައެވެ.

ސިޓީ ބަލިވުމުން، ލީގުގެ އެއް ވަނައިގައި އަށް ޕޮއިންޓަށް ލީޑުފުޅާކުރަން ލިވަޕޫލަށް ވަނީ ފުރުސަތު ލިބިފައެވެ. އެއް ވަނައިގައި އޮތް ލިވަޕޫލަށް 11 މެޗުން 28 ޕޮއިންޓް ލިބިފައިވާއިރު، ސިޓީ އަށް 12 މެޗުން ވަނީ 22 ޕޮއިންޓް ލިބިފައެވެ.

ތިން ވަނައިގައި އޮތް ޗެލްސީ އާއި ހަތަރެއްގައި އޮތް އާސެނަލް އަދި ފަސް ވަނައިގައި އޮތް ބްރައިޓަން އަށް ވަނީ 12 މެޗުން 22 ޕޮއިންޓް ލިބިފައެވެ. މި ނަތީޖާތަކާއެކު، ލީގު ތާވަލުގެ ވާދަވެރިކަން ވަނީ ވަރަށް ބޮޑުވެފައެވެ.