ވެރިކަމަށް ކުރިމަތިލުމުގެ ވިސްނުމެއް ނުގެންގުޅުއްވާނެ ކަމަށް މަޖިލިސް ރައީސް ވިދާޅުވެއްޖެ

ވެރިކަމަށް ކުރިމަތިލުމުގެ ވިސްނުމެއް ދުވަހަކުވެސް ނުގެންގުޅުއްވާނެ ކަމަށާއި އެފަދަ ފުރުސަތެއް ލިބުނަސް އެކަމުން ސަލާމަތްވާނެ ކަމަށް ޕިއެންސީގެ ޗެއާޕާސަން އަދި މަޖިލިސް ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

ރޭ ޕީއެންސީ އޮފީހުގައި ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ، ދިވެހިރާއްޖޭގެ ވެރިކަމަށް ކުރިމަތިލުމުގެ ވިސްނުމެއް ދުވަހަކު ވެސް ނުގެންގުޅުއްވާނެ ކަމަށާއި، ކުރިއަށް އޮތްތާގައި ވެސް ނުގެންގުޅުއްވާނެ ކަމަށެވެ. އަދި އެފަދަ ފުރުސަތެއް ލިބުނަސް އެކަމުން ސަލާމަތްވާނެ ކަމަށް ވިދާޅުވިއެވެ.

އަބްދުއްރަހީމް އިތުރަށް ވިދާޅުވީ، އެމަނިކުފާނުގެ އަމާޒަކީ ރައީސް މުއިއްޒު ދެވަނަ ދައުރަކަށް ހޮވުމަށް މަސައްކަތްކުރުން ކަމަށެވެ. އަދި ޕީއެންސީގެ އަސާސީ ގަވާއިދު ބުނާ ގޮތުން، 2028 ގެ ރިޔާސީ އިންތިޚާބަށް ރައީސް މުއިއްޒަށް ޕްރައިމަރީއަކާ ނުލައި ޓިކެޓް ލިބިވަޑައިގަންނަވާނެ ކަމަށް ވިދާޅުވިއެވެ.

ރައީސް މުއިއްޒާއި އަބްދުއްރަހީމްގެ ގުޅުން ގޯސްވެފައިވާ ކަމަށް ބުނެ އަޑުއުފުލޭ މައްސަލައާ ގުޅޭގޮތުން ވާހަކަދައްކަައްކަވަމުން، އަބްދުއްރަހީމް ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވިއިރަށްވުރެ، މިހާރު އޮތް ގުޅުން މާ ބޮޑު ކަމަށެވެ. އަދި ދެ ބޭފުޅުންގެ ގުޅުން ވަރުގަދަވެފައިވާ ކަމަށް ވިދާޅުވިއެވެ.

އަބްދުއްރަހީމް ވިދާޅުވީ، 2012 އިން ފެށިގެން ރައީސް މުއިއްޒާއި އެމަނިކުފާނާ ދެމެދު ގާތްކަން އުފެދިފައިވާ ކަމަށާއި، އެ ގާތްކަން މިހާރު އިތުރަށް ވަރުގަދަވެފައިވާ ކަމަށެވެ. އަދި ރައީސް މުއިއްޒު ވެރިކަމަށް ވަޑައިގަތުމާއެކު، ޕީއެންސީގެ ރައީސްގެ ހައިސިއްޔަތުން އެމަނިކުފާނާއެކު މަސައްކަތްކުރަމުންދާ ކަމަށް ވިދާޅުވިއެވެ.