މާލެ އާއި ވިލިމާލޭގެ މަގުތައް އަލުން ހެދުމުގެ މަސައްކަތް ފަށައިފި

މާލެ އާއި ވިލިމާލޭގެ މަގުތައް ރަނގަޅު ފެންވަރަކަށް އަލުން ހެދުމުގެ މަސައްކަތް ސަރުކާރުން ފަށައިފިއެވެ.

ރައީސް ޑރ. މުހައްމަދު މުއިއްޒުގެ ވައުދެއްގެ ގޮތުގައި ހިމެނޭ މި މަސައްކަތް ފަށާފައި ވަނީ އިއްޔެ ކަމަށް  ހައުސިން މިނިސްޓްރީން މައުލޫމާތު ދެއްވައެވެ.  

މި މަޝްރޫއު ކުރިއަށް ގެންދަނީ ޗައިނާ ސަރުކާރުގެ އެހީގައެވެ. މިއީ މިދިޔަ ޖެނުއަރީ މަހު ރައީސް ޗައިނާއަށް ކުރެއްވި ދަތުރުފުޅުގައި ސޮއި ކުރެއްވި މަޝްރޫއެކެވެ.

ހައުސިން މިނިސްޓްރީން ބުނެފައިވާ ގޮތުގައި، މަޝްރޫއުގެ މައިގަނޑު ސްޓޭކްހޯލްޑަރުންނާއެކު ބޭއްވި ބައްދަލުވުންތަކަށް ފަހު، ޗައިނާގެ ސަރުކާރުން އައްޔަން ކުރި ފަންނީ ޓީމުން މަގުތަކުގެ ހާލަތު ދެނެގަނެފައިވެއެވެ. މި މަސައްކަތް ކުރިއަށް ގެންގޮސްފައިވަނީ މި މަހުގެ 5 އިން 21 އަށެވެ.

މި މުއްދަތުގެ ތެރޭގައި، އެ ޓީމުން ވަނީ މަގުތަކުގެ ފީސިބިލިޓީ ދިރާސާގެ މަސައްކަތް ކުރިއަށް ގެންގޮސްފައެވެ. މި މަޝްރޫއުގެ މަގްސަދަކީ، ހާލަތު ދަށްވެފައިވާ މަގުތައް ޒަމާނީ ފެންވަރަށް ބަދަލުކުރުމެވެ. ދެން ކުރިއަށް އޮތީ އެ މަސައްކަތުގެ ޑިޒައިނިން މަރުހަލާއެވެ.

ހައުސިން މިނިސްޓްރީން ކުރިން ހާމަކޮށްފައިވާ ގޮތުގައި، މި މަޝްރޫއުގެ ދަށުން މާލޭގެ މަގުތަކުގައި ތާރު އަޅައި ތަރައްގީކުރާނެއެވެ. އަދި އެކަން ކުރާނީ، ފެނާއި ނަރުދަމާގެ ނިޒާމާއި ކަރަންޓު އަޕްގްރޭޑްކޮށްފައެވެ. މީގެ އިތުރުން ފަޔާ ހައިޑްރަންޓް ނިޒާމާއި ސްޓޯމް ވޯޓާ ނިޒާމް ވެސް ގާއިމު ކުރާނެ ކަމަށް ބުނެފައިވެއެވެ.