މެސީ ހިމެނޭގޮތަށް އާޖެންޓީނާ އިން އަންނަ އަހަރު އިންޑިއާގެ ކެރަލާގައި މެޗެއް ކުޅެނީ

އަންނަ އަހަރު އާޖެންޓީނާ އިން ލިއޮނަލް މެސީ ހިމެނޭ ގޮތަށް އިންޑިއާގެ ކެރަލާގައި މެޗެއް ކުޅެން ހަމަޖެހިފައިވާ ކަމަށް ކެރަލާގެ ސްޓޭޓް ސްޕޯޓްސް މިނިސްޓްރީން އިއުލާނުކޮށްފިއެވެ.

ކެރަލާގެ ސްޕޯޓްސް މިނިސްޓަރު، ވީ އަބްދުއްރަހުމާން ވިދާޅުވީ، މެސީ ހިމެނޭ ގޮތަށް އާޖެންޓީނާ އިން އަންނަ އަހަރު ކެރަލާގައި މެޗެއް ކުޅޭ ގޮތަށް އާޖެންޓީނާގެ ފުޓްބޯޅަ ފެޑެރޭޝަނާ އެކު އެއްބަސްވުމަކަށް އާދެވިފައިވާ ކަމަށެވެ.

މިދިޔަ ސެޕްޓެމްބަރު މަހު މެޑްރިޑްގައި، އާޖެންޓީނާގެ ފުޓްބޯޅަ ފެޑެރޭޝަނާ އެކު، ވީ އަބްދުއްރަހްމާން އާއި ކެރަލާގެ ޗީފް މިނިސްޓަރު، ޕިނަޔާރީ ވިޖަޔަން ބައްދަލުވުމެއް ބޭއްވިކަމަށް ރިޕޯޓްތައް ބުނެ އެވެ.

އަބްދުއްރަހުމާން ވިދާޅުވީ، ދުނިޔޭގެ އެއް ވަނަ ފުޓްބޯޅަ ކުޅުންތެރިޔާ، މެސީ ހިމެނޭހެން ކެރަލާގައި މެޗެއް ކުޅެން އާޖެންޓީނާ އިން އަންނައިރު، މި މެޗުގެ ހުރިހާ ކަމެއް ބަލަހައްޓާނީ ސްޓޭޓް ސަރުކާރުން ކަމަށެވެ. އަދި މި މެޗާ ގުޅޭ މުހިންމު ކަންތައްތަކެއް މަޝްވަރާ ކުރުމަށް ކުރިއަށް އޮތް ދޮޅު މަހެއްހާ ދުވަސްތެރޭ އާޖެންޓީނާ ފުޓްބޯޅަ ފެޑެރޭޝަނުން ކެރަލާ އަށް ޒިޔާރަތްކުރާ ގޮތަށް ހަމަޖެހިފައިވާ ކަމަށެވެ.

ފީފާ އިންޓަނޭޝަނަލް ބްރޭކެއްގައި އިންޑިއާ ގައުމީ ޓީމާ ދެކޮޅަށް އާޖެންޓީނާ އިން ކުޅޭ މި މެޗު ކޯޗީގައި ކުޅުމުގެ ފުރުސަތު ބޮޑެވެ. އެކަމަކު، އަބްދުއްރަހުމާން ވިދާޅުވީ، ކުޅޭނެ ތާރީހަކާއި ސްޓޭޑިއަމެއް ކަނޑައަޅާނީ ދެން އޮންނަ ބައްދަލުވުމެއްގަ އެވެ.

މެސީ ވަނީ 2011 ވަނަ އަހަރު އިންޑިއާގައި މެޗެއް ކުޅެފަ އެވެ. އެއީ، ކަލްކަތާގެ ސޯލްޓް ލޭކް ސްޓޭޑިއަމްގައި ވެނެޒުއޭލާއާ ދެކޮޅަށް ކުޅެ 1-0 އިން މޮޅުވި އެކުވެރިކަމުގެ މެޗުގަ އެވެ.