ޕީއެންސީ އެތެރޭގެ އިންތިހާބުގެ ވޯޓުލުން ފަށައިފި

ސަރުކާރު ހިންގައި ޕީޕަލް ނޭޝަނަލް ކޮންގްރެސް (ޕީއެންސީ)ގެ އެތެރޭގެ އިންތިހާބުގެ ވޯޓުލުން ފަށައިފިއެވެ.

މިއީ ރާއްޖޭގައި ސިޔާސީ ޕާޓީއަކުން އިންތިޒާމު ކުރާ އެތެރޭގެ އެންމެ ބޮޑު އިންތިހާބެވެ.

ވޯޓް ލާން ފަށާފައިވަނީ ހެނދުނު 10:00 ގައެވެ. ވޯޓް ލުން މެންދުރުފަހު 2:00 އާ ހަމައަށް ކުރިއަށް ގެންދާނެއެވެ.

މި އިންތިޚާބުގައި، މާލޭގައި ބަހައްޓާ 56 ވޯޓް ފޮށްޓާއެކު ޖުމުލަ 144 ވޯޓް ފޮށި ބެހެއްޓުމަށް ހަމަޖެހިފައިވާ ކަމަށް ޕީއެންސީން ބުނެ އެވެ. އިންތިހާބުގައި ވޯޓުލުމުގެ ހައްގު ލިބިފައިވާ 33،500 މީހުން އެބަތިބި ކަމަށް އެ ޕާޓީން ބުންޏެވެ.

މުޅިއެކު 1984 މަގާމަށް މީހުން އިންތިހާބު ކުރަން ނިންމާފައިވާ މި އިންތިހާބުގައި 648 ކެންޑިޑޭޓުން ވާދަ ކުރެއެވެ.

އަނެއް 1300 މަގާމަށް، އެންމެ ކެންޑިޑޭޓަކު ކުރިމަތި ލާފައިވާތީ، އެ މަގާމުތަކަށް ވަނީ އިންތިހާބަކާ ނުލައި މީހުން ހޮވިފައެވެ.

މާލެއާއި އަތޮޅުތެރޭގައި އަަތޮޅު ތެރޭގައި އިންތިހާބު އޮންނަ 88 ރަށުގައި ވޮޓު ލުމުގެ ހައްގު ލިބިފައިވާ 33500 މެމްބަރުން އެބަތިއްބެވެ.

މާލޭގައި ވޯޓް ލުން ކުރިއަށް ގެންދަނީ ދަރުބާރުގޭގައެވެ. ހުޅުމާލެއިން ރެހެންދި ސުކޫލްގައެވެ.

މި އިންތިހާބުގައި ރާއްޖޭގެ އެކި ކަންކޮޅު ތަކުން ޖުމުލަ 2،095 މެންބަރުން ޕާޓީގެ އެކިއެކި މަގާމުތަކަށް އައްޔަން ކުރާނެއެވެ.

ކުރިއަށް މިވަގު ދާ މި އިންތިހާބުގައި ހޮވުމަށް ހަމަޖެހިފައިވަނީ ދާއިރާ ރައީސުންނާއި، ދާއިރާ ނައިބްރައީސުންނާއި، ޒުވާނުންގެ ހަރަކާތުގެ ރަށު ރައީސްއާއި، އަންހެނުންގެ ހަރަކާތުގެ ރަށު ރައީސްއާއި، ސްޓިއަރިން ކޮމިޓީގެ މެންބަރުން އަދި އެ ކޮމިޓީގެ އިންތިހާބީ މަގާމުތަކެވެ.