އާރުޓީއަށް ޖަވާބު ނުދެވުނީ މުވައްޒަފެއްގެ އިހުމާލުން، ފިޔަވަޅު އަޅައިފިން: ހައުސިން މިނިސްޓްރީ
ހައުސިން މިނިސްޓަރު، ޑރ. އަލީ ހައިދަރު --
މައުލޫމާތު ހޯދައި ލިބިގަތުމުގެ ގާނޫނުގެ ދަށުން ހުށަހެޅި މައްސަލައަކާ ގުޅުވައިގެން އިންފޮމޭޝަން ކޮމިޝަނަރު އޮފީސް (އައިކޮމް)އަށް ޖަވާބުދާރީވުމަށް ބޭއްވި އަޑުއެހުމަށް ހާޒިރު ނުވެވުނީ، އެތަނުގެ މުވައްޒަފެއްގެ އިހުމާލުން ކަމަށް ހައުސިން މިނިސްޓްރީން މިއަދު ބުނެފިއެވެ.
މި ނޮވެމްބަރު މަހުގެ ހަތް ވަނަ ދުވަހު އައިކޮމްގައި އޮންލައިންކޮށް ބާއްވަން ތާވަލުކުރި އަޑުއެހުމަކަށް ހައުސިން މިނިސްޓްރީން ހާޒިރުވެފައި ނުވާ މައްސަލައިގައި އައިކޮމް އިން ވަނީ އެ މިނިސްޓްރީ، 350 ރުފިޔާ އިން ޖޫރިމަނާ ކޮށްފައެވެ.
އައިކޮމް އިން ބުނީ އެ މިނިސްޓްރީ ޖޫރިމަނާ ކުރަންޖެހުނީ އެއްވެސް އެއްޗެއް އެންގުމަކައި ނުލައި އަޑުއެހުމަށް ހާޒިރުނުވުމުގެ ސަބަބުން ކަމަށެވެ.
މި މައްސަލައާ ގުޅުވައިގެން ހައުސިން މިނިސްޓްރީން ނޫސްބަޔާނެއް މިއަދު ނެރެފައިވެއެވެ.
އެ ބަޔާނުގައި ބުނަނީ އެ މިނިސްޓްރީގެ ކަންކަން އެންމެ ހާމަކަން ބޮޑު ގޮތެއްގައި އަދި ޖަވާބުދާރީ ކުރުވަނިވި ގޮތެއްގައި ކުރިއަށް ގެންދިއުމަށް މައުލޫމާތު ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދުމަށް އެދި ހުށަހަޅައި ހުށަހެޅުން ތަކަށް ކަނޑައެޅިފައިވާ މުއްދަތުގައި މައުލޫމާތު ފޯރުކޮށް ދިނުމަކީ ވަރަށް ބޮޑަށް އިސްކަމެއް ދޭ ކަމެއް ކަމަށެވެ.
އެހެންވެ، ނޮވެމްބަރުގައި ހަތް ވަނަ ދުވަހު އައިކޮމްއިން އެ މިނިސްޓްރީ ޖޫރިމަނާ ކުރުމަކީ އެ މިނިސްޓްރީގެ މުވައްޒަފެއްގެ އިހުމާލުން ހިނގާފައިވާ ކަމެއް ކަމަށެވެ.
އެ މުވައްޒަފާ މެދު ސިވިލް ސާވިސް ގަވާއިދުގައިވާ ގޮތުން ފިޔަވަޅު އެޅުމުގެ ކަންކަން ކުރިއަށް ދާ ކަމަށްވެސް މިނިސްޓްރީގެ ބަޔާނުގައި ވެއެވެ. އަދި ބުނެފައިވަނީ މިފަދަ ކަންކަން ތަކުރާރު ވިޔަ ނުދިނުމަށްޓަކައި ކަމާ ގުޅޭ އުސޫލުތައް ހަރުދަނާ ކުރުމުގެ މަސައްކަތް ކުރަމުން އަންނަ ކަމަށެވެ.
ކޮމެންޓް