ކ. ގުޅިން ފާނަބަސަންދުގެ 11 ކޭސް، ދެމީހަކު އެޑްމިޓްކޮށްގެން އިތުރު ފަރުވާ ދެނީ

ކ. ގުޅިން ފާނަބަސަންދު ކޭސްތަކެއް ފެނިފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފިއެވެ.

އެޗްޕީއޭ އިން ބުނީ މި އަހަރުގެ ނޮވެމްބަރު މަހު ކ. ގުޅިން ފާނަބަސަންދުގެ 11 ކޭސް ވަނީ ރިޕޯޓް ކޮށްފައި ކަމަށާއި އޭގެ ތެރެއިން ދެ މީހަކު އައިޖީއެމް ހޮސްޕިޓަލުގައި އެނދުމަތިކޮށްގެން އިތުރު ފަރުވާދެމުން ދާ ކަމަށެވެ.

ފާނަބަސަންދުގެ ކޭސްތައް އާންމުކޮށް ރާއްޖޭގެ އެކި ހިސާބުތަކުން ކޮންމެ އަހަރަކުވެސް ރިޕޯޓް ކުރާ ކަމަށް އެޗްޕީއޭ އިން ބުނެއެވެ.

އެގޮތުން މިއަހަރުގެ ނޮވެމްބަރުމަހާ ހަމައަށް މުޅި ރާއްޖެއިން 2977 ކޭސް ރިޕޯޓުކޮށްފައިވާ ކަމަށް އެޗްޕީއޭގެ ތަފާތު ހިސާބުތަކުން ދައްކައެވެ.

މީގެ ތެރޭގައި މާލޭ ސަރަހައްދުން 1506 ކޭސް ރިޕޯޓްކޮށްފައިވާއިރު އަތޮޅުތަކުން ރިޕޯޓު ކުރި އަދަދު އުޅެނީ 1471 ގައެވެ.

ފާނަބަސަންދު (ޗިކަން ޕޮކްސް) އަކީ ވައިރަހެއްގެ ޒަރީއާއިން ޖެހޭ ގައިން ގަޔަށް އަރާ ބައްޔެކެވެ.

މިއީ ވަރަށް ފަސޭހައިން ފެތުރޭ ނުރައްކައުތެރި ބައްޔެކެވެ. މި ބަލި އާންމުކޮށް ފެތުރެނީ ނޭވާލާ ނިޒާމުގެ ޒަރިއްޔާއިންނެވެ.

ބަލި ޖެހިފައިވާ މީހާ ކެއްސާ، ކިނބިހި، އެޅުމުގެ ސަބަބުން ނޭވާލާ ނިޒާމުގައިވާ ލޮނދި ފަށަލައިގައި ހުންނަ ޖަރާސީމުތައް އެހެން މީހުންގެ ހަށިގަނޑަށް ވާސިލު ވެއެވެ.

އަދި މިބަލި ޖެހިފައި ތިބޭ މީހުންގެ ހަމުގައި ހުންނަ ބްލިސްޓާސް (ޕޮކްސް) ތަކުން އަންނަ ދިޔަ އެހެން މީހުންގެ ގައިގައި ޖެހި އެތެރެހަށްޓަށް ވައިރަސް ފޯރުމުންވެސް މިބަލި ޖެހެއެވެ.

ބަލީގެ ޖަރާސީމު ހަށިގަނޑަށް ވަންނަތާ 14 ނުވަތަ 16 ދުވަސް ފަހުން ބަލީގެ އަލާމާތައް ފެންނަން ފަށައެވެ. ނަމަވެސް ދިފާއީ ބާރު ދަށް މީހުންނަށް މި އަލާމާތްތައް ފެންނަން ފަށަނީ 10 ދުވަހާއި 21 ދުވަހާ ދޭތެރޭގައެވެ.

މި ބަލީގެ އަލާމާތްތަކުގެ ތެރޭގައި:

ވަރުބަލިކަން އިހްސާސްކުރެވުން

ހުންއައުން

ކާހިތްނުވުން

ބޮލުގައި ރިއްސުން

ކެއްސުން

ކަރަށް ތަދުވުން

ބަނޑުގައި ރިއްސުން

ބްލިސްޓާސް (ފެންއަރާފައި ހުން ބިހިތަކެއް) ނެގުން

އެޗްޕީއޭއިން ވަނީ ފާނަބަސަންދުގެ އަލާމާތްތައް ދެނެގަނެ، ރައްކާތެރިކަމުގެ ފިޔަވަޅު އެޅުމަށްވެސް އިލްތިމާސްކޮށްފައެވެ.