އެމްޕީއެލްގައި ތަމްރީނު ހެދުމުގެ ފުރުސަތު، ކޮންމެ މަހަކު 5000 ރުފިޔާ

ނޭޝަނަލް އެޕްރެންޓިސްޝިޕް ޕްރޮގްރާމްގެ ދަށުން އަންހެނުންނަށް ހާއްސަކޮށްގެން މޯލްޑިވްސް ޕޯޓްސް ލިމިޑެޓް (އެމްޕީއެލް)ގައި އެކި ދާއިރާތަކުން ތަމްރީނުވުމުގެ ފުރުސަތު ހުޅުވާލައިފިއެވެ.

ޔޫތު މިނިސްޓްރީއާ ގުޅިގެން އެމްޕީއެލް އިން ހިންގައި ޕްރޮގްރާމްގެ ތަމްރީނުގެ މުއްދަތުގައި ކޮންމެ މަހަކު އެލަވެންސެއްގެ ގޮތުގައި 5،000 ރުފިޔާ ލިބޭނެ ކަމަށް އެ ކުންފުނިން ބުންޏެވެ.

މާލޭގެ ވިޔަފާރި ބަނދަރު ހިންގައި ކުންފުނިން ހުޅުވައިލި، މި ތަމްރީން ޕްރޮގްރާމުގައި ބައިވެރިވާން އެދި ފޯމު ހުށަހެޅުމުގެ އެންމެ ފަހު ތާރީހަކީ ފެށޭ ހަފުތާގެ އާދީއްތަ ދުވަހުގެ ކުރިންނެވެ.

މި ޕްރޮގްރާމްގެ ދަށުން ހަތް ދާއިރާއަކުން ޖުމުލަ 18 ފަރާތެއް ތަމްރީންކުރުމަށް އެ ކުންފުނިން ވަނީ ނިންމާފައެވެ.

ތަމްރީނުވާން ފުރުސަތު ހުޅުވައިލި ދާއިރާތަކަކީ:

ކާޕެންޓާ: 2 ޖާގަ

މެރިން މެކޭނިކް: (މެރިން އިންޖިނިއަރިން) 2 ޖާގަ

ވެލްޑާ: 4 ޖާގަ

މެޝިނިސްޓް: 2 ޖާގަ

އިލެކްޓްރީޝަން: (އިލެކްޓްރިކަލް އިންޖިނިއަރިން): 3 ޖާގަ

މެކޭނިކް: (ވެހިކަލް ރިޕެއާ): 2 ޖާގަ

އެއާ ކޮންޑިޝަނިން އެންޑް ރެފްރިޖަރޭޝަން: 3 ޖާގަ، މިއެވެ.

މި ތަމްރީނު ތަކުގެ ތެރެއިން ކާޕެންޓްރީއާއި ވެލްޑިން އިން ތަމްރީނު ހޯދުމަށް ހުށަހަޅައި ފަރާތްތަކުގެ ކިބައިގައި ގްރޭޑް އަށެއްގެ ފެންވަރު ހުރުމާ އެކު އެމީހަކީ އުުމުރުން 18-35 އަހަރާ ދެމެދުގެ މީހަކަށް ވާން ޖެހޭނެއެވެ.

އޭގެ އިތުރުން ދެން އެ ހުރި ދާއިރާތަކަށް އެދި ހުށަހަޅައި ފަރާތަކީ ޖީސީ އީ އޯލެވެލް އިމްތިހާނުން މަދުވެގެން ތިން މާއްދާއިން ދަށްވެގެން 'ސީ' ފާސް ލިބިފައިވާ މީހަކަށް ވާންޖެހެއެވެ.

ހަ މަސް ދުވަހުގެ މުއްދަތަށް ކުރިއަށް ގެންދާ މި ތަމްރީނު ޕްރޮގްރާމް ފުރިހަމަ ކުރާ ފަރާތްތަކަށް ދިވެހިރާއްޖޭގެ ގައުމީ ސަނަދުގެ އޮނިގަނޑުގެ ލެވެލް ތިނެއްގެ ސެޓްފިކެޓެއް ލިބޭނެއެވެ.