އިޒްރޭލުގެ ބޮޑުވަޒީރާއި ކުރީގެ ޑިފެންސް މިނިސްޓަރު ހައްޔަރުކުރަން އަމުރުކޮށްފި

ނަތަންޔާހޫ އާއި އޭނާގެ ކުރީގެ ޑިފެންސް މިނިސްޓަރ

ފަލަސްތީނުގެ ގާޒާގައި ހިންގަމުންދާ ލާއިންސާނީ ޖަރީމާތަކުގެ ކުށުގައި، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު ޔޮއޭވް ގަލަންޓް ހައްޔަރުކުރުމަށް އިންޓަނޭޝަނަލް ކްރިމިނަލް ކޯޓު (އައިސީސީ) އިން އަމުރުކޮށްފިއެވެ.

އައިސީސީން ނެރުނު އަމުރުގައި ބުނެފައިވަނީ މިދިޔަ އަހަރުގެ އޮކްޓޯބަރުން ފެށިގެން މި އަހަރުގެ މޭ މަހާ ހަމައަށް ހިންގި ލާއިންސާނީ ޖަރީމާތަކުގެ ކުށުގައި މި ދެ މީހުން ހައްޔަރުކުރަން އަމުރުކުރި ކަމަށެވެ. މި އަމުރުގައި ފާހަގަކޮށްފައިވަނީ ގާޒާގެޒާގެ ރައްޔިތުން ކާބޯތަކެއްޗާއި ފެނާއި ބޭހާއި ބޭސްފަރުވާގެ އިތުރުން ތެލާއި ކަރަންޓުގެ ޚިދުމަތް ފަދަ ދިރިހުރުމަށް ކޮންމެހެން ބޭނުންވާ ޒަރޫރީ އެއްޗެހިން ގަސްދުގައި މަޙްރޫމްކުރުވި ކަމަށް ބެލެވޭ ކަމަށެވެ.

މިދިޔަ އަހަރުގެ އޮކްޓޯބަރު 8 އިން ފެށިގެން ގާޒާއަށް އިޒްރޭލުން ވަދެގަނެ ހިންގަމުންދާ ހަމަލާތަކުގައި މިހާތަނަށް 41,000 ފަލަސްތީނީން މަރުވެފައިވާ ކަމަށް ބުނެވެއެވެ. އައިސީސީން ބުނެފައިވަނީ މި މަރުތަކުގެ ޒިންމާ ނަގަންޖެހޭނީ ނަތަންޔާހޫ އާއި ގަލަންޓް ކަމަށެވެ.

މީގެއިތުރުން، އައިސީސީން ވަނީ ހަމާސްގެ ލީޑަރެއް ކަމަށްވާ މުޙައްމަދު ދިއާބް އިބްރާހިމް އަލް މަސްރީ (ދެއިފް) ހައްޔަރުކުރުމަށްވެސް އަމުރުކޮށްފައެވެ. ނަމަވެސް އިޒްރޭލުން ބުނެފައިވަނީ މިދިޔަ ޖުލައި މަހު ގާޒާއަށް ދިން ހަމަލާއެއްގައި ދެއިފް މަރާލާފައިވާ ކަމަށެވެ. އޭނާގެ މަރު އަދި ކަށަވަރުވެފައެއް ނުވެއެވެ.

އިސްރާޢީލް ފަލަސްތީން