ސްޓެލްކޯއިން އިސްލާމީ މަރުކަޒުގެ މުންނާރު ވަށައިގެން އޮންނަ މަސް ފެންގަނޑު މަރާމާތުކޮށްދީފި

ސަރުކާރުގެ ކަރަންޓު ކުންފުނި ސްޓެލްކޯ އިން އިސްލާމީ މަރުކަޒުގެ މުންނާރު ވަށައިގެން އޮންނަ މަސްފެންގަނޑު މަރާމާތުކޮށް ނިންމައި އިސްލާމިކް މިނިސްޓްރީއާ މިއަދު ހަވާލުކޮށްފިއެވެ.

މިއީ ސްޓެލްކޯގެ އިޖުތިމާއީ ޒިންމާގެ ދަށުން މިދިޔަ މަހު ފެށި މަސައްކަތެކެވެ.

އިސްލާމީ މަރުކަޒުގެ ގޯތިތެރޭގައި މިއަދު ހެނދުނު ބޭއްވި ރަސްމިއްޔާތުގައި މަސައްކަތް ނިމުނުކަމުގެ ލިޔުން އިސްލާމިކް މިނިސްޓާ ޑރ. މުޙައްމަދު ޝަހީމް އަލީ ސައީދާ ހަވާލުކޮށްދެއްވީ ސްޓެލްކޯގެ މެނޭޖިން ޑިރެކްޓާ ހުސައިން ފަހުމީއެވެ.

މި ރަސްމިއްޔާތުގައި އެމްޑީ ފަހުމީ ވަނީ އެ މަސައްކަތް ކުރުމުގެ ފުރުސަތު ސަރުކާރާއި މިނިސްޓްރީން ދިން ކަމަށްޓަކައި އެފަރާތްތަކަށް ޝުކުރު އަދާކޮށްފައެވެ.

މީގެ އިތުރުން އެހާ ފުރިހަމަކޮށް އެ މަސައްކަތް ނިންމައިދިން ކަމަށްޓަކައި މަސައްކަތުގައި ބައިވެރިވި އެ ކުންފުނީގެ އެންމެހައި މުވައްޒަފުންނަށް ފަހުމީ ޝުކުރު އަދާކުރެއްވިއެވެ.

އިސްލާމީ މަރުކަޒުގެ މުންނާރު ވަށައިގެން އޮންނަ މަސްފެންގަނޑު ހެދުމުގެ މަސައްކަތާ ސްޓެލްކޯ އިން ހަވާލުވީ އެ މަސައްކަތް ކޮށްދޭނެ ބަޔަކު ހޯދުމަށް އިސްލާމިކް މިނިސްޓްރީން ކުރި އިއުލާން ބާތިލްކުރި ފަހުންނެވެ.

މިނިސްޓްރީން އިއުލާން ބާތިލްކުރީ ހަރަދު ކުޑަކުރަން ސަރުކާރުން ކުރާ މަސައްކަތްތަކަށް އެއްބާރުލުން ދިނުމުގެ ގޮތުންނެވެ.

އިސްލާމީ މަރުކަޒުގެ މަސްފެންގަނޑު އަލުން ރީތި ކުރުމުގެ މަސައްކަތް ފަށާފައި މިވަނީ މަރުކަޒަށް 40 އަހަރު ފުރުމުގެ މުނާސަބާ ފާހަގަކުރުމަށެވެ.