އިސްލާމީ މަރުކަޒުގެ މަސްފެންގަނޑު މަރާމާތުކޮށް ހަވާލުކޮށްފި

މަރާމާތަށް ފަހު މަސްފެންގަނޑު ހަވާލުކުރުން

އިސްލާމީ މަރުކަޒުގެ މުންނާރު ކައިރީ އޮތް މަސްފެންގަނޑު ސްޓެލްކޯގެ ފަރާތުން މަރާމާތުކޮށް ނިންމައި، މިއަދު އިސްލާމިކް މިނިސްޓްރީއާ ހަވާލުކޮށްފިއެވެ.

މި މަސްފެންގަނޑަކީ މީގެ 40 އަހަރު ކުރިން އިސްލާމީ މަރުކަޒު ހުޅުވުނުއިރުވެސް ހަދާފައިވާ ތަނެކެވެ.

ގިނަ ދުވަސްތަކެއް ވަންދެން މަރާމާތު ނުކުރެވި އޮތުމުގެ ސަބަބުން ބޭނުން ނުކުރެވި އޮތް މި މަސްފެންގަނޑު މަރާމާތުކޮށްދޭނެ ފަރާތެއް ހޯދުމަށް އިސްލާމިކް މިނިސްޓްރީން މިދިޔަ މަހު ފުރުސަތު ހުޅުވާލިއެވެ. މިއީ އިސްލާމީ މަރުކަޒު ހުޅުވިތާ 40 އަހަރު ފުރުން ފާހަގަކުރުމާ ދިމާކޮށް ކުރި މަސައްކަތެކެވެ.

ސްޓެލްކޯއިން މި މަސައްކަތް ކޮށްދިނީ އެ ކުންފުނީގެ ސީއެސްއާރު ޕްރޮޖެކްޓެއްގެ ގޮތުގައެވެ. މަރާމާތުކޮށް ނިމުނު މަސްފެންގަނޑު މިނިސްޓްރީއާ ހަވާލުކުރީ މިއަދު އެ ސަރަހައްދުގައި ބޭއްވުނު ޚާއްސަ ރަސްމިއްޔާތެއްގައެވެ.

މި ރަސްމިއްޔާތުގައި ސްޓެލްކޯގެ މެނޭޖިންގ ޑިރެކްޓަރު ހުސައިން ފަހުމީ އާއި އެ ކުންފުނީގެ މުވައްޒަފުންނާއި، އިސްލާމިކް މިނިސްޓަރު ޑރ. ޝަހީމް އަލީ ސަޢީދާއި މިނިސްޓްރީގެ އިސް ބޭފުޅުން ބައިވެރިވެވަޑައިގަތެވެ.

މީގެ ކުރިން ވަރަށް ހަޑިކޮށް އޮތް މި މަސްފެންގަނޑު މިހާރު ވަނީ އެއްކޮށް ސާފުކޮށް، ކުލަ ބަދަލުކޮށް، މަސްވެސް ލައިފައެވެ. މި މަސައްކަތް ނިންމާލުމާއެކު، އިސްލާމީ މަރުކަޒުގެ ޒީނަތްތެރިކަން އިތުރުވެ، ޒިޔާރަތްކުރާ ފަރާތްތަކަށް އުފާވެރި މަންޒަރެއް ފެންނާނެއެވެ.

އިސްލާމިކް މިނިސްޓްރީ ސްޓެލްކޯ