މާފުށީ ހޮސްޕިޓަލާއި ކާށިދޫ ސިއްހީމަރުކަޒުގައި ފިޒިއޮތެރަޕީގެ ހިދުމަތް ފެށުމަށް ތައްޔާރުވަނީ

ކ. މާފުށީ ހޮސްޕިޓަލާއި ކ. ކާށިދޫ ޞިއްޙީ މަރުކަޒުގައި ފިޒިއޮތެރަޕީގެ ޚިދުމަތް ދިނުމަށް ބޭނުންވާ ސާމާނު ސަޕްލައިކޮށްދޭނެ ފަރާތެއް ހޯދުމަށް ހެލްތު މިނިސްޓްރީން އަލުން އިޢުލާން ކޮށްފިއެވެ.

މި އިޢުލާނަކީ ކުރިން ކުރި އިޢުލާނާ ގުޅިގެން ކުރިމަތިލީ އެންމެ ފަރާތުގެ ޝަރުތު ހަމަނުވުމާ ގުޅިގެން ކުރެވުނު އިޢުލާނެކެވެ.

މި މަސައްކަތަށް ޝައުޤުވެރިވާ ފަރާތްތަކަށް 19 ނޮވެމްބަރުން ފެށިގެން 28 ނޮވެމްބަރުގެ މެންދުރުފަހު 13:00 ގެ ކުރިން ރަޖިސްޓަރީވުމަށް ހެލްތު މިނިސްޓްރީން އަންގާފައިވެއެވެ. ރަޖިސްޓަރީވުމަށް ގެޒެޓްކުރެވިފައިވާ ރަޖިސްޓްރޭޝަން ޝީޓް ފުރިހަމަކުރުމަށްފަހު tender@health.gov.mv އަށް އީމެއިލް ކުރަންވާނެއެވެ.

އަންދާސީ ހިސާބު ހުށަހެޅުމަށް ހަމަޖެހިފައިވަނީ 17 ޑިސެމްބަރު އަންގާރަ ދުވަހުގެ ހެނދުނު 11:30 ގައި ހެލްތު މިނިސްޓްރީގައެވެ. މި އިޢުލާނާ ގުޅޭގޮތުން އިތުރު މަޢުލޫމާތު ސާފުކުރަން ބޭނުންވާ ފަރާތްތަކަށް 1 ޑިސެމްބަރުގެ ކުރިން އީމެއިލް މެދުވެރިކޮށް ސުވާލު ހުށަހެޅުމުގެ ފުރުޞަތު ދީފައިވެއެވެ.

ހެލްތު މިނިސްޓްރީން އަންގާފައިވާ ގޮތުގައި ރަޖިސްޓަރީ ނުކުރާ ފަރާތްތަކާއި އަންދާސީ ހިސާބު ހުށަހެޅުމަށް ކަނޑައެޅިފައިވާ ގަޑިއަށް ހާޒިރުނުވާ ފަރާތްތަކުގެ އަންދާސީ ހިސާބު ބަލައެއް ނުގަނެވޭނެއެވެ. މިއީ މި މަސައްކަތަށް ކުރިމަތިލާ ފަރާތްތަކުން ސަމާލުކަން ދޭންޖެހޭ މުހިންމު ނުކުތާއެކެވެ.

މާފުށީ ޞިއްޙީ މަރުކަޒު ހޮސްޕިޓަލަކަށް ބަދަލުކުރެވުނީ މިދިޔަ އަހަރުގެ ޖުލައި މަހުގައި ކަމަށްވީނަމަވެސް، އޭރު ހޮސްޕިޓަލަކުން ލިބެންޖެހޭ ގިނަ ޚިދުމަތްތައް ވަނީ ޤާއިމު ނުކުރެވެއެވެ. މިހާރު މި ފިޒިއޮތެރަޕީގެ ޚިދުމަތް ފެށުމަށް ތައްޔާރުވަމުންދާއިރު، މިއީ ހޮސްޕިޓަލުގެ ޚިދުމަތްތައް ފުޅާކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.