ނިއު ރޭޑިއަންޓްގެ އައު ޗެއާމަނަކަށް އަހުމަދު މުބީން އިންތިޚާބުކޮށްފި

ރާއްޖޭގެ އެންމެ ކާމިޔާބު ފުޓުބޯޅަ ކްލަބް، ނިއު ރޭޑިއަންޓް ސްޕޯޓްސް ކްލަބްގެ ޗެއާމަނަކަށް ރީޖަނަލް އެއާޕޯޓްސްގެ މެނޭޖިންގް ޑިރެކްޓަރު އަހުމަދު މުބީން އިންތިޚާބުކޮށްފިއެވެ.

ނިއުއިން ރޭ އެ ކްލަބްގެ ކޮންގްރެސް ބޭއްވިއިރު، އެ ކްލަބްގެ ކުރީގެ ޗެއާމަން އަހުމަދު ވާސިފް ވަނީ މަގާމުން އިސްތިއުފާ ދެއްވައިފައެވެ. ދަރުބާރުގޭގައި ކުރިއަށްދިޔަ ނިއުގެ ކޮންގްރެސްގައި އެ ކްލަބުން ވަނީ ކުރިއަށް އޮތް ތަނުގައި އެ ކްލަބްގެ ހިންގުން ހަވާލުކުރާނެ ހިންގާ ކޮމެޓީ އިންތިޚާބުކޮށްފައެވެ.

ޗެއާމަނުކަމާ ހަވާލުވުމަށްފަހު މުބީން ވިދާޅުވީ، އުންމީދަކީ ނިއުގެ ސަޕޯޓަރުންނާ ކްލަބްގެ ކުރީގެ ކުޅުންތެރިންނާ ގުޅިގެން ނިއު އަލުން ފުޓުބޯޅައިގެ ރަސްކަމަށް ގެނައުން ކަމަށެވެ. އޭނާ އަލަށް އިންތިޚާބުވީ ޓީމުގެ އެންމެ އިސް މަސައްކަތަކީ ނިއު ވެއްޓިފައިވާ އަނދަވަޅުން ސަލާމަތް ކުރުން ކަމަށެވެ.

"އަޅުގަނޑުމެންގެ ހަމައެކަނި އަމާޒަކީ ނިއުރޭޑިއަންޓް ސަލާމަތް ކުރުމެއް ނޫން. އަޅުގަނޑުމެންގެ އަމާޒަކީ ނިއުގެ އިތުރުން ފުޓުބޯޅަ ހަމަ މަގަށް އެޅުވުން," މުބީން ވިދާޅުވިއެވެ.

ނިއުއިން ވަނީ އެ ކްލަބް ހިންގުމުގައި ހަރުދަނާ ފިޔަވަޅެއްގެ ގޮތުން، އަސާސީ ގަވާއިދަށް ވެސް ބަދަލުތަކެއް ގެނެސްފައެވެ. އެ ގޮތުން، ނިއުއިން ކުރިން ގެންގުޅުނު ޗަންދާ ނެގުމުގެ އުސޫލު ވަނީ ކޮންމެހެން މަޖުބޫރުކޮށް އޮތް އޮތުމުގެ ބަދަލުގައި އިޚްތިޔާރީ ކަމެއްގެ ގޮތުގައި ބަދަލުކޮށްފައެވެ.

ނިއުއިން މިދިޔަ ސީޒަނުގެ ދެ ވަނަ ޑިވިޝަނުގައި، ބަލިވީ ސެމީ ފައިނަލުގައި ބުރު ސްޕޯޓްސް ކްލަބް އަތުންނެވެ. އެންމެ ފަހުން ބޭއްވި، ދެ ވަނަ ޑިވިޝަނުގައި ފައިނަލަށް ދާ ދެ ޓީމެއް ފުރަތަމަ ޑިވިޝަނަށް ޕްރޮމޯޓްވާ ގޮތަށް އެފްއޭއެމްއިން ގަވާއިދު ހެދި އެވެ. ނަމަވެސް ނިއުއަށް ދެ ވަނަ ފަހަރު ވެސް އެކަން ނާކާމިޔާބުވީ، ސެމީއާ ހަމައިންނެވެ.