ލުބްނާނުގައި 200 އަށްވުރެ ގިނަ ކުޑަކުދިން ޝަހީދުވެއްޖެ: ޔުނިސެފް

ލުބްނާނުގައި ހިނގަމުންދާ ހަނގުރާމައިގެ ތެރޭގައި ފާއިތުވި ދެ މަހެއްހާ ދުވަހުގެ ތެރޭގައި 200 އަށްވުރެ ގިނަ ކުޑަކުދިން ޝަހީދުވެފައިވާ ކަމަށް ޔުނިސެފުން ހާމަކޮށްފިއެވެ.

މި ހަނގުރާމަ ފެށިފައިވަނީ ސެޕްޓެންބަރު 23 ވަނަ ދުވަހު އިސްރާއީލުން ލުބްނާނަށް ހަމަލާ ދިނުމާ ގުޅިގެންނެވެ.

ޔުނިސެފްގެ ތަރުޖަމާނު ޖޭމްސް އެލްޑަރ ވިދާޅުވީ، ލުބްނާނުގައި ޝަހީދުވެފައިވާ ކުޑަކުދިންގެ އަދަދު 200 އަށް އުފުލިފައިވާއިރު، އިތުރު 1,100 އަށްވުރެ ގިނަ ކުދިން ޒަޚަމްވެފައިވާ ކަމަށެވެ. އޭނާ އިތުރަށް ވިދާޅުވީ މި އަނިޔާވެރިކަން ހުއްޓުވުމަށް އެކަށީގެންވާ މަސައްކަތްތަކެއް ކުރަމުންދާ މަންޒަރެއް ނުފެންނަ ކަމަށެވެ.

ލުބްނާނުގެ ޞިއްޙަތާ ބެހޭ ވުޒާރާއިން ބުނެފައިވަނީ މި ހަނގުރާމައިގައި ޝަހީދުވެފައިވާ ޢާންމުންގެ އަދަދު 3,516 އަށް އުފުލިފައިވާ ކަމަށެވެ. މީގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނޭ ކަމަށް އެ ވުޒާރާއިން ބުނެފައިވެއެވެ. އަދި ޒަޚަމްވެފައިވާ މީހުންގެ އަދަދު 14,929 އަށް އަރާ ކަމަށްވެސް ބުނެފައިވެއެވެ.

އދ. އިން ބުނެފައިވާ ގޮތުގައި މި ހަނގުރާމައިގެ ސަބަބުން ގެދޮރު ގެއްލިފައިވާ މީހުންގެ އަދަދު 1.2 މިލިއަނަށް އަރާ ކަމަށާއި، މީގެ ތެރެއިން ގިނަ އަދަދެއްގެ ބަޔަކު މިހާރު ދިރިއުޅެމުންދަނީ މަގުމަތީގައި ކަމަށެވެ. ޔުނިސެފުން ބުނެފައިވަނީ މި ހާލަތުގައި ތިބި ކުޑަކުދިންނަށް އެހީތެރިކަން ފޯރުކޮށްދިނުމަށް މަސައްކަތްކުރަމުންދާ ކަމަށެވެ.

ޔުނިސެފްގެ ތަރުޖަމާނު އެލްޑަރ ވިދާޅުވީ، ލުބްނާނުގައި މިހާރު ފެންނަމުންދާ މަންޒަރުތަކަކީ ޣައްޒާގައި ފެންނަމުންދާ މަންޒަރުތަކާ އެއްފަދަ ކަމަށެވެ. އޭނާ އިތުރަށް ވިދާޅުވީ، ލުބްނާނުގައި ވެސް ބަލައިނުގަނެވޭނެ ކަންކަން މަޑުމަޑުން އާންމުވަމުންދާ ކަމަށެވެ.