ތިލަފުށި ފަޅުތެރެއިން އުޅަނދުތައް ނެގުމަށް އެޗްޑީސީން އަންގައިފި

ތިލަފުށި ފަޅުތެރޭގައި ހުރި އުޅަނދުތައް ނަގަން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފިއެވެ.

އެޗްޑީސީން ކުރި އިޢުލާނެއްގައި ބުނެފައިވަނީ، ތިލަފުށި ފަޅުތެރޭގައި ގަވާއިދާ ޚިލާފަށް އަޅާފައިވާ އުޅަނދުތައް ނަގައި އެ ސަރަހައްދު ސާފުކުރުމުގެ މަސައްކަތް ކުރަމުން އަންނަ ކަމަށެވެ.

އެޗްޑީސީން އާންމުކޮށްފައިވާ ޗާޓުގައި ފާހަގަކޮށްފައިވާ ސަރަހައްދުގައި އަޅާފައިވާ އުޅަނދުތަކުގެ ތެރެއިން އެއްވެސް އުޅަނދެއްގެ ވެރިފަރާތެއް ވާނަމަ، ތިލަފުށި އޮޕަރޭޝަންސް ޑިޕާޓްމަންޓްގެ ނަންބަރު 9398888 އަށް ގުޅައި މަޢުލޫމާތު ސާފުކުރުމަށްފަހު، މިއަދުން ފެށިގެން 15 ދުވަހުގެ ތެރޭގައި އުޅަނދުތައް ނެގުމަށް އަންގާފައިވެއެވެ.

މި މުއްދަތުގައި އުޅަނދުތައް ނަގާފައި ނުވާނަމަ، އެއީ ވެރިފަރާތުން ބޭނުން ނެތިގެން ދޫކޮށްލާފައިވާ އުޅަނދުތަކެއް ކަމަށް ބަލައި، އެޗްޑީސީން ކަނޑައަޅާ ގޮތެއްގެ މަތިން އުޅަނދުތަކާމެދު ޢަމަލުކުރާނެ ކަމަށް އެ ކުންފުނިން ބުނެފައިވެއެވެ.

މިފަދަ ކަންކަމުގައި އާންމު ރައްޔިތުންނާއި ވިޔަފާރިތަކުގެ ފަރާތުން އެ ކޯޕަރޭޝަނަށް ދޭ އެއްބާރުލުން ފާހަގަކޮށް، އެޗްޑީސީން ޝުކުރު އަދާކޮށްފައިވެއެވެ. މި މަސައްކަތަކީ ތިލަފުށި ފަޅުތެރެ ސާފުކޮށް، އެ ސަރަހައްދުގެ ތިމާވެށި ރައްކާތެރިކުރުމަށް ކުރެވޭ މުހިންމު މަސައްކަތެއް ކަމަށް ބެލެވެއެވެ.