ރައީސް މުއިއްޒުއާއި ސަރުކާރު ދެމިއޮންނާނީ ފަލަސްތީނުގެ ހައްގުގައި ކަމުގެ ޔަގީންކަން ދެން: ޕީއެންސީ

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އާއި އެމަނިކުފާނުގެ ސަރުކާރާ އަދި ޕާޓީވެސް ދެމިއޮންނާނީ ފަލަސްތީނުގެ ހައްގުގައި ކަމުގެ ޔަގީންކަން ޕީޕަލްސް ނެޝަނަލް ކޮންގްރެސް (ޕީއެންސީ) އިން ރައްޔިތުންނަށް މިރޭ ދީފިއެވެ.

ޕީއެންސީ އިން ނެރުނު ބަޔާނެއްގައި ބުނަނީ މަޖިލީހުގައި މިއަދު އެމްޑީޕީގެ ފަރާތުން ހުށަހެޅި އިޒްރޭލު ޕާސްޕޯޓު މަނާ ކުރުމުގެ ބިލު އަވަސްކުރުމަށް ބާރު އެޅުމަށް ސަރުކާރަށް ގޮވައިލައި ގަރާރު ބަލައިނުގަތުމަށް ޕީއެންސީގެ ޕާލިމަންޓްރީ ގުރޫޕުން ވޯޓު ދިނީ މަޖިލީހުގައި މިއަދު ކުރަންހުރި މަސައްކަތްތަކުގެ ވަގުތު ނަގައިލުމުގެ ބޭނުމުގައި، އެއްވެސް ހެޔޮނިޔަތެއް ނެތި މަޖިލީހަށް ހުށަހެޅި ގަރާރެއް ކަމަށް ފެންނާތީ ކަމަށެވެ.

އެކަމަކު އިޒްރޭލް ޕާސްޕޯޓް މަނާކުރުމުގެ ބިލުގެ މަސައްކަތް ކަނޑައެޅިފައިވާ ތާވަލާ އެއްގޮތަށް ހުއްޓުމެއް ނެތި ކުރިޔަށްދާނެކަމުގެ ޔަގީންކަން ޕީއެންސީން ދީފައިވެއެވެ.

އެޕާޓީގެ ބަޔާނުގައި ބުނެފައިވާ ގޮތުން، ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އަނިޔާވެރި ޢަމަލުތައް ބައިނަލްއަގުވާމީ މަސްރަހުގައި އެންމެ ހަރު އަޑުން ކުށްވެރި ކުރައްވައި، ފަލަސްތީނުގެ ދައުލަތެއް ގާއިމް ކުރުމަށާއި އިޒްރޭލު ޖަވާބުދާރީ ކުރުވުމަށް އެންމެ ވަރުގަދައަށް ވަކާލާތުކުރައްވައި އެއް ލީޑަރަކީ ރައީސް ޑރ. މުޙައްމަދު މުއިއްޒުއެވެ.

ވެރިކަން ކުރާ ޕީއެންސީގެ ބަޔާނުުގައި އިތުރަށް ބުނީ ފަލަސްތީނުގެ ރައްޔިތުންނަށް އެންމެ ބޮޑު މާލީ އެހީތެރިކަމެއް މިހާތަނަށް ވެ ދިނީވެސް އެ ޕާޓީ އިން ސަރުކާރު ހިންގުމުގައި މި ހޭދަކުރި އެއް އަހަރު ތެރޭގައި ކަމަށެވެ.

އަދި ރައީސް މުއިއްޒު އާއި އެމަނިކުފާނުގެ ސަރުކާރާ އެ ޕާޓީވެސް ދެމިއޮންނާނީ ފަލަސްތީނުގެ ހައްގުގައި ކަމުގެ ޔަގީންކަން ޕީއެންސީ އިން ވަނީ ރައްޔިތުންނަށް އަރުވާފައެވެ.