އެމްޑީޕީގެ އެކްޓިވިސްޓުން މަޖިލިސް ދޮށުގައި މުޒާހަރާކޮށް ހަމަނުޖެހުން ހިންގަން އުޅެފި

ރައްޔިތުންގެ މަޖިލީހުގެ މެންބަރުން ޕާޓީ ބަދަލުކޮށްފި ނަމަ، ގޮނޑި ގެއްލޭގޮތަށް ގާނޫނު އަސާސީއަށް ގެންނަ އިސްލާހަށް ނުރުހިގެން އިދިކޮޅު އެމްޑީޕީ ސަޕޯޓަރުން މަޖިލިސް ދޮށަށް އެއްވެ އަޑުގަދަކޮށް ހަމަނުޖެހުން ހިންގަން އުޅެފިއެވެ.

އިދިކޮޅު އެމްޑީޕީގެ މަދު މެންބަރުންތަކެއް މަޖިލިސް ކުރާ ގެ ކައިރީގައި ވަނީ އަޑުގަދަކޮށް އެ އެތަނުގެ މަސްލަހަތު ގެއްލޭ ގޮތަށް އަމަލުކޮށްފައެވެ.

އެމްޑީޕީން މަޖިލިސް ދޮށުގައި އަޑު އުފުލަމުން ދަނީ ގާނޫނުއަސާސީގެ ދިފާއުގައި ކަމަށް ބުނެއެވެ.

ޕީއެންސީގެ ސަޕޯޓަރުން މަޖިލިސް ދޮށަށް އެއްވީ މެންބަރުން ޕާޓީ ބަދަލުކޮށްފި ނަމަ، ގޮނޑި ގެއްލޭ ގޮތަށް ގާނޫނު އަސާސީއަށް ގެންނަ އިސްލާހަށް ތާއީދު ކުރުމުގެ ގޮތުންނެވެ.

އެމީހުން ގޮވަމުންދަނީ ގާނޫނުއަސާސީއަށް ހުށަހަޅާފައިވާ އިސްލާހުތައް ފާސް ކުރުމަށެވެ. އެމްޑީޕީގެ ސަޕޯޓަރުން ގޮވަމުންދަނީ އިސްލާހުތައް ބޭރުކޮށްލުމަށެވެ.

މި ސަަރަހައްދަށް އެއްވެ ތިބި އެމްޑީޕީ ސަޕޯޓަރުންނާއި ޕީއެންސީގެ ސިޔާސީ މުވައްޒަފުންގެ މެދުގައި ވަނީ ބަހުގެ ހަމަލާތައްވެސް ދީފައެވެ. އެހެންވެ، އެއްވުމުން ވަނީ ކޮންމެވެސް ވަރަކަށް ހޫނުވެ ހަމަނުޖެހުންތަކެއް ހިނގައިފައެވެ.

އެމްޑީޕީން އިސްވެ ފެށި، އެ ހަމަނުޖެހުން ކޮންޓްރޯލް ކުރަން އުޅުނު ބައެއް ފުލުހުންނަށް އަނިޔާވެފައިވާ މަންޒަރު ފެންނަ ފޮޓޯތަކާއި ވީޑިއޯތައް ސޯޝަލް މީޑިއާގައި އާންމުވެފައިވެއެވެ.

މަޖިލީސް ކުރާ ގޭ ކައިރިއަށް އެއްވެ ތިބި މީހުންގެ ތެރޭގައި އެމްޑީޕީގެ ގައުމީ މަޖިލީހުގެ ބައެއް މެންބަރުންގެ އިތުރުން އެމްޑީޕީގެ މަދު އަދަދެއްގެ އެކްޓިވިސްޓުން ހިމެނެއެވެ.

ގާނޫނު އަސާސީ އިސްލާހު ކުރަނީ ޕާޓީ ބަދަލުކުރުމުން ގޮނޑި ގެއްލޭ ގޮަތަށާއި މަޖިލީހުގެ ޖުމްލަ އަގުލަބިއްޔަތުން ފާސްކޮށްގެން ނޫން ގޮތަކަށް ރައްޖޭގެ އެއްވެސް ސަރަހައްދެއްގައި ބޭރުގެ ސިފައިންނަށް ނުތިބެވޭ ގޮތް ހަދުމަށެވެ.