ރައްޔިތުންގެ ބާރު ރައްޔިތުންނަށް ދިނުުމަށް ރައީސް ކެނޑިނޭޅި މަސައްކަތް ކުރައްވާ: މުހުތާޒު މުހުސިން
ކުރީގެ ޕީޖީ މުހުތާޒް، އަދި ރައީސް ޑރ. މުއިއްޒާ އެކު، ކެމްޕެއިން ތެރޭގައި ބައްދަލުކުރައްވަނީ.
ރައްޔިތުންގެ ބާރު ރައްޔިތުންނަށް ދެއްވުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކެނޑިނޭޅި މަސައްކަތް ކުރައްވަމުންދާ ކަމަށް ފޮރިން މިނިސްޓްރީގެ ސްޓޭޓް މިނިސްޓަރު، ކުރީގެ ޕްރޮސިކިއުޓާ ޖެނެރަލް މުހުތާޒު މުހުސިން ވިދާޅުވެއްޖެއެވެ.
ޓްވިޓާގައި މުހުތާޒު ކުރެއްވި ޕޯސްޓެއްގައި ވިދާޅުވީ ރައްޔިތުންނަށް ބާރު ދިނުމަށް ދެކޮޅުހަދާ ފަރާތްތައް މިހާރު އެދަނީ ތިލަވަމުން ކަމަށެވެ.
އޭނާ ވިދާޅުވީ ރައީސް ޑރ. މުއިއްޒު އެ ގެންދަވަނީ ރައްޔިތުންގެ ބާރު ރައްޔިތުންނަށް ދެއްވުމަށް ކެންޑިނޭޅި މަސައްކަތް ކުރައްވަމުން ކަމަށާއި ގާނޫނު އަސާސީއަށް ހުށަހަޅާފައިވާ އިސްލާހަކީ [ޕާޓީ ބަދަލުކުރުމުން ގޮނޑި ގެއްލޭ އިސްލާހު] އަކީ އެކަމުގެ ހެކި ކަމަށެވެ.
ރައްޔިތުންގެ މަޖިލީހަށް މެމްބަރުން އިންތިހާބުވާ ޕާޓީ ބަދަލުކޮށްފި ނަމަ، އެ މެމްބަރެއްގެ ގޮނޑި ގެއްލޭ ގޮތަށް ގާނޫނުއަސާސީއަށް އިސްލާހު ގެންނަން ހުށަހަޅައި ބިލްގެ އިބުތިދާއީ ބަހުސް މިއަދު ނިންމާލާފައިވާއިރު، ދިރާސާ ކުރުމަށްޓަކައި މުޅި މަޖިލީހުގެ ކޮމިޓީއަށް ވަނީ ފޮނުވައިފައެވެ.
ގާނޫނުއަސާސީގައި އެންޓި ޑިފެކްޝަންގެ މާއްދާތައް ހިމަނަން ސަރުކާރުގެ ފަރާތުން އިސްލާހު ހުށަހެޅުއްވީ ހުޅުދޫ ދާއިރާގެ މެންބަރު މުޙައްމަދު ޝާހިދުއެވެ.
ސަރުކާރުގެ ފަރާތުން ގާނޫނުއަސާސީ އަށް ހުށަހެޅި އިސްލާހުގައި ބުނަނީ ވަކި ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަ ކޮށްގެން އިންތިހާބުވުމަށް ފަހު، އެ ދައުރުގެ ތެރޭގައި އެ ސިޔާސީ ޕާޓީއަކުން އަމިއްލަ އަށް ވަކިވެއްޖެ ނަމަ ނުވަތަ ޕާޓީން ވަކި ކޮށްފި ނަމަ ނުވަތަ އެހެން ސިޔާސީ ޕާޓީއެއްގެ މެންބަރަކަށް ވެއްޖެ ނަމަ އެ މީހަކު މަޖިލިހުގެ މެންބަރުކަމުން ވަކިވާނެ ކަމަށެވެ.
އިސްލާހުގައިވާ ގޮތުން މަޖިލީހުގެ މެންބަރަކު މިހާރު ތަމްސީލް ކުރަމުން އަންނަ ސިޔާސީ ޕާޓީން އަމިއްލަ އަށް ވަކިވެއްޖެ، ނުވަތަ ވަކި ކޮށްފި ނަމަ ނުވަތަ އެހެން ޕާޓީއަކާ ގުޅިއްޖެ ނަމަވެސް ގޮނޑި ގެއްލޭނެ ކަމަށެވެ.
އޭގެ އިތުރުން އަމިއްލަ ގޮތުން ވާދަކޮށްގެން އިންތިހާބުވާ މެންބަރަކު ސިޔާސީ ޕާޓީއަކާ ގުޅިއްޖެ ނަމަވެސް އެ މެންބަރެއްގެ ގޮނޑި ގެއްލޭނެ ކަމަށް އެ އިސްލާހުގައި ބުނެފައިވެއެވެ.
ކޮމެންޓް