ސީ ޓު އެއާ ކާގޯ ހިދުމަތަށް ވޯލްޑް ކާގޯ އެއާލައިނެއް ގުޅިއްޖެ

މެލޭޝިއާގެ އެއަރލައިނެއް ކަމަށްވާ ވޯލްޑް ކާގޯ އެއަރލައިން

ރާއްޖޭގެ ސީ ޓު އެއާ ކާގޯ ހިދުމަތަށް އައު އެއާލައިނެއް އިތުރުވެއްޖެއެވެ.

މިފަހަރު މި ޚިދުމަތާ ގުޅިފައިވަނީ މެލޭޝިއާގެ އެއަރލައިނެއް ކަމަށްވާ ވޯލްޑް ކާގޯ އެއަރލައިނެވެ. މި ޚިދުމަތަކީ ކަނޑުމަގުން އަންނަ މުދާ، ޓްރާންސިޓްކޮށް ވައިގެ މަގުން ދުނިޔޭގެ އެހެން ޤައުމުތަކަށް ފޮނުވުމެވެ.

ވޯލްޑް ކާގޯ އެއަރލައިނުން މި ޚިދުމަތް ފެށުމުގެ ގޮތުން ވަނީ ބަންގްލަދޭޝުން ރާއްޖެއަށް ކަނޑު މަގުން ގެނައި އަންނައުނުގެ ބާވަތްތައް ޔޫރަޕްގެ އެކި ޤައުމުތަކަށް ގެންގޮސްފައެވެ. މި ޚިދުމަތަކީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، މޯލްޑިވްސް ޕޯޓްސް ލިމިޓެޑް އަދި މޯލްޑިވްސް ކަސްޓަމްސް ސަރވިސް ގުޅިގެން ފޯރުކޮށްދޭ ޚިދުމަތެކެވެ.

ސީ ޓު އެއާ ކާގޯގެ ޚިދުމަތް ރާއްޖޭގައި ތަޢާރަފުކުރީ މިއަހަރުގެ މާރިޗު މަހުގެ ތެރޭގައެވެ. މިހާތަނަށް 12 އެއަރލައިން ވަނީ މި ޚިދުމަތާ ގުޅިފައެވެ. މި ޚިދުމަތަކީ ރައީސް ޑރ. މުޙައްމަދު މުޢިއްޒުގެ ވެރިކަމުގައި ރާއްޖޭގެ އިޤްތިޞާދު ހަރުދަނާ ކުރެއްވުމަށް ފެށްޓެވި މަސައްކަތްޕުޅުތަކުގެ ތެރެއިން ކަމެކެވެ.

އެމްޕީއެލްއިން ބުނެފައިވާ ގޮތުގައި މި ޚިދުމަތް މިހާރު ބާރު ސްޕީޑުގައި ފުޅާވަމުން އަންނަ ކަމަށާއި، މިހާތަނަށް މި މަސައްކަތުން ރާއްޖޭގެ އިޤްތިޞާދަށް 3 މިލިއަނަށްވުރެ ގިނަ ޑޮލަރު ވަދެފައިވާ ކަމަށް އެ ކުންފުނިން ވަނީ ހާމަކޮށްފައެވެ. މިއީ ދުނިޔޭގެ ވަރަށް ގިނަ ޤައުމުތަކުން ކުރަމުން އަންނަ، އަދި އެ ޤައުމުތަކުގެ އިޤްތިޞާދަށް ބޮޑެތި މަންފާތަކެއް ލިބެމުން އަންނަ މަސައްކަތެކެވެ.

އެމްޕީއެލް