ގާނޫނުއަސާސީއަށް އިސްލާހު ގެނައުމަށް ރައްޔިތުންގެ ހިޔާލު ހޯދުން ލާޒިމުކުރުމަށް ބިލެއް ހުށަހަޅައިފި

ރައްޔިތުންގެ މަޖިލީހުގެ މިއަދުގެ ޖަލްސޖަލްސާގައި ޤާނޫނުއަސާސީއަށް އިޞްލާޙު ގެނައުމުގެ ބިލެއް ހުށަހަޅައިފިއެވެ. މި ބިލު ސަރުކާރުގެ ފަރާތުން ހުށަހެޅުއްވީ ޕީއެންސީގެ ޕާލިމެންޓަރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުޙައްމަދު ޝާހިދު (ޝާޑު) އެވެ.

މި ބިލުގައި ހުށަހަޅާފައިވަނީ ޤާނޫނުއަސާސީގެ އަސާސީ ޙައްޤުތަކާއި މިނިވަންކަމުގެ ބާބު، ރައީސުލްޖުމްހޫރިއްޔާގެ މަޤާމުގެ މުއްދަތު އަދި މަޖިލިސް މެންބަރުންގެ މަޤާމުގެ މުއްދަތު ފަދަ މުހިންމު މާއްދާތަކަށް އިޞްލާޙު ގެނައުމަށް ރައްޔިތުންގެ ހިޔާލު ހޯދުން ލާޒިމުކުރާ މާއްދާ އިޞްލާޙު ކުރުމަށް ވެސް ރައްޔިތުންގެ ހިޔާލު ހޯދަންޖެހޭ ގޮތަށް ހެދުމަށެވެ.

މިހާރު ޤާނޫނުއަސާސީގެ 262 ވަނަ މާއްދާގެ (ށ) ގައި ބަޔާންކޮށްފައިވާ ގޮތުން، އަސާސީ ޙައްޤުތަކާއި މިނިވަންކަމުގެ ބާބު، މަޖިލީހުގެ އުމުރު އަދި ރިޔާސީ ދައުރާދައުރާއި ރައީސް އިންތިޚާބުކުރާ ގޮތަށް އިޞްލާޙު ގެނައުމަށް ރައްޔިތުންގެ ހިޔާލު ހޯދަންޖެހެއެވެ. ނަމަވެސް މި މާއްދާ އިޞްލާޙުކުރުމަށް ރައްޔިތުންގެ ހިޔާލު ހޯދަން ނުޖެހެއެވެ.

މެންބަރު ޝާހިދު ހުށަހެޅުއްވި އިޞްލާޙުގައިވާ ގޮތުން، މި މާއްދާ އިޞްލާޙުކުރުމަށް ވެސް ރައްޔިތުންގެ ހިޔާލު ހޯދަންޖެހޭނެއެވެ. މީގެ އިތުރުން، ރާއްޖޭގެ ޚާއްޞަ އިޤްތިޞާދީ ސަރަޙައްދަށް (އީއީޒެޑް) އެއްވެސް ބަދަލެއް ގެނައުމަށް ވެސް މަޖިލީހުގެ ތިންބައިކުޅަ ދެބައިގެ އަޣުލަބިއްޔަތު ބޭނުންވާ ގޮތަށް އިޞްލާޙު ހުށަހަޅުއްވާފައިވެއެވެ.

މި ބިލު ހުށަހެޅުއްވުމާއެކު، މިއަދުގެ ޖަލްސާގައި ފުރަތަމަ ކިޔުން އިއްވައި، ބަހުސް ފެށުމަށް ވަނީ ތާވަލުކޮށްފައެވެ. މި ބިލަކީ ޤާނޫނުއަސާސީގެ މުހިންމު މާއްދާތަކަށް އިޞްލާޙު ގެނައުމުގައި ރައްޔިތުންގެ ބައިވެރިވުން އިތުރުކުރުމަށް މަގުފަހިކުރާނެ ބިލެއް ކަމަށް ބެލެވެއެވެ.