ގާސިމް އިބްރާހިމްގެ ނަމުގައި ދައުރުވާ އޭއައި ސްކޭމް އޯޑިއޯތަކާމެދު ސަމާލުވުމަށް އެދިއްޖެ

ގާސިމް އިބްރާހިމް

އާޓިފިޝަލް އިންޓެލިޖެންސް (އޭއައި)ގެ އެހީގައި ހަދާފައިވާ، ވިޔަފާރިވެރިޔާ އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމްގެ ނަމުގައި ސްކޭމް އޯޑިއޯތަކެއް ދައުރުކުރާތީ ސަމާލުވާން އޭނާ ރޭ އެދިވަޑައިގެންފިއެވެ.

ގާސިމް 'އެކްސް'ގައި ކުރެއްވި ޕޯސްޓެއްގައި ވިދާޅުވި ގޮތުގައި، މި އޯޑިއޯތަކުގައި އޮފްޝޯ ޓްރޭޑްކުރުމަށާއި އިންވެސްޓްކޮށް، އަވަހަށް ނަފާ ލިބޭނެ ފަދަ މާލީ މުއާމަލާތްތައް ދިވެހިންނަށް އޭނާ ހޯއްދަވައިދޭ ކަމަށް ދައްކުވައިދީފައި ހުރެއެވެ. އަދި ރާއްޖޭގެ ގައުމީ ބޭންކު މެދުވެރިކޮށް ސްކީމްގެ ފައިދާ ލިބޭނެކަމަށް ވެސް ބަޔާންކޮށްފައި ހުރެއެވެ.

މި އޯޑިއޯތައް ގިނައިން ޕޯސްޓްކޮށްފައިވަނީ ޓިކްޓޮކާއި އިންސްޓަގްރާމް ފަދަ ސޯޝަލް މީޑިއާގެ އެކި ވަސީލަތްތަކުގައެވެ. ގާސިމް ވަނީ، މީހުންނަށް އޮޅުވާލައި 'ޒަމާނީކޮށް' ކުރަމުންދާ މި ސްކޭމްތައް، އެކި ވައިބަރ ގްރޫޕާއި ވަޓްސްއެޕް ގުރޫޕުތަކުގައި ނުފެތުރުމަށް އެދިވަޑައިގެންފައެވެ.

"މި ފަދަ އެއްވެސް ބާވަތެއްގެ ސްކޭމެއްގައި، ދިވެހި ލޮބުވެތި އެއްވެސް ރައްޔިތަކު ޖެހިވަޑައިނުގަތުމަކީ އަޅުގަނޑުގެ ވަރަށް ބޮޑު އެދުމެކެވެ," ގާސިމް ވިދާޅުވިއެވެ.

އޭނާ ވިދާޅުވީ މި ފަދަ ބައެއް އޯޑިއޯތަކަކީ ހަގީގަތެއް ކަމަށް ހީކޮށް، ބައެއް ފަހަރު އެ ކްލިޕްތައް އޭނާއަށް ފޮނުވާ ކަމަށެވެ. އެހެންވެ، އެއީ ހަގީގަތެއް ނޫންކަމަށާއި އޮޅުވާލައިގެން ފައިސާ ހޯދުމަށް ކުރާ، ދަށުދަރަޖައިގެ ކަމެއް ކަމަށް ގާސިމް ވިދާޅުވިއެވެ.

ޤާޞިމް އިބްރާޙިމް