އާޖެންޓީނާ އިން ޕެރޫ ބަލިކޮށް ވޯލްޑް ކަޕް ކޮލިފައިން ތާވަލުގައި ލީޑު ފުޅާކޮށްފި

ފީފާ ވޯލްޑް ކަޕް ކޮލިފައިންގައި ޕެރޫ އާ ދެކޮޅަށް މިއަދު ކުޅުނު މެޗު 1-0 ގެ ނަތީޖާއަކުން އާޖެންޓީނާއިން ކާމިޔާބުކޮށްފިއެވެ.

މި ކާމިޔާބީއާއެކު އާޖެންޓީނާ ވަނީ ގްރޫޕުގައި މިހާތަނަށް ކުޅުނު 12 މެޗުން 25 ޕޮއިންޓާއެކު ތާވަލުގެ އެއްވަނައިގައި 5 ޕޮއިންޓުގެ ލީޑެއް ހޯދާފައެވެ.

މެޗުގެ ހަމައެކަނި ލަނޑު ޖެހީ ދެވަނަ ހާފުގެ ކުޅުން ފެށުނުތާ ދިހަ ވަނަ މިނިޓުގައި ލައުޓާރޯ މާޓިނޭޒެވެ. މިއީ މާޓިނޭޒް ގައުމީ ޓީމަށް ކާމިޔާބު ކޮށްދިން 32 ވަނަ ލަނޑެވެ. މި ލަނޑާއެކު އޭނާ އާޖެންޓީނާގެ ގައުމީ ޓީމަށް އެންމެ ގިނައިން ލަނޑު ޖެހި ފަސް ކުޅުންތެރިންގެ ތެރޭގައި ހިމެނިފައިވެއެވެ.

ދެކުނު އެމެރިކާގެ ކޮލިފައިންގައި މިއަދު ކުޅުނު އެހެން މެޗުތަކަށް ބަލާއިރު ބްރެޒިލް އުރުގުއޭ އާއި ދެކޮޅަށް ކުޅުނު މެޗު ނިމިފައިވަނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.

ޖުމްލަ ދިހަ ޓީމު ހިމެނޭ ދެކުނު އެމެރިކާގެ ރައުންޑް ރޮބިން ކޮލިފައިންގެ ގަދަ ހަޓީމަށް ވޯލްޑް ކަޕްގެ ޖާގައެއް ލިބިގެންދާއިރު ހަތްވަނަ ޓީމަށް ޖެހޭނީ އިންޓަކޮންޓިނެންޓަލް ޕްލޭ އޮފް ދެ މެޗު ކުޅުމަށެވެ.

މި މެޗުގައި ފެނިގެންދިޔަ ހަމައެކަނި ލަނޑު އާޖެންޓީނާއަށް ކާމިޔާބު ކޮށްދިން ލައުޓާރޯ މާޓިނޭޒް މެޗަށް ފަހު ބުނެފައިވަނީ ދުނިޔޭގެ ޗެމްޕިއަން ކޮލިފައިންގެ އެއްވަނަ މަގާމުގައި ފަސް ޕޮއިންޓުގެ ތަފާތަކާއެކު މި އަހަރު ނންމާލެވޭތީ އުފާކުރާ ކަމަށެވެ.